திருமணமாகி 3 மாதங்களே ஆச்சு… கார் விபத்தில் துடிதுடித்து பலியான தம்பதி… நெஞ்சை உலுக்கும் சோகம்..!!

கர்நாடக மாநிலம் சிந்தாமணி – பெங்களூரு சாலையில் நிகழ்ந்த பயங்கர சாலை விபத்தில், மின்சார இருசக்கர வாகனத்தில் சென்ற சண்முகா – மிதுனா தம்பதியினர் சம்பவ இடத்திலேயே பரிதாபமாக உயிரிழந்தனர். இரவு நேரத்தில் தம்பதியினர் தங்களது இருசக்கர வாகனத்தில் சென்றபோது, எதிரே வந்த கார் ஒன்று இவர்களது வாகனத்தின் மீது நேருக்கு நேர் மோதியதாக முதற்கட்ட விசாரணையில் தெரியவந்துள்ளது.

மரணமடைந்த சண்முகா மற்றும் மிதுனா தம்பதியினருக்குத் திருமணமாகி 3 மாதங்களே ஆன நிலையில், இந்த கோர விபத்து நிகழ்ந்துள்ளது இரு தரப்பு குடும்பத்தினரிடமும், உள்ளூர் மக்களிடமும் பெரும் சோகத்தையும் அதிர்ச்சியையும் ஏற்படுத்தியுள்ளது. காரின் கடுமையான மோதலின் தாக்கத்தால், தம்பதியினர் இருவரும் சம்பவ இடத்திலேயே தங்களது இன்னுயிரை இழந்தனர்.

விபத்துக்குள்ளான காரில் பயணித்த 3 பேர் காயங்களுடன் மீட்கப்பட்டு, சிகிச்சைக்காக அருகில் உள்ள மருத்துவமனையில் அனுமதிக்கப்பட்டுள்ளனர். இந்த விபத்து குறித்து காவல் துறையினர் வழக்குப் பதிவு செய்து, அதிவேகமாக கார் ஓட்டப்பட்டதா என்பது உள்ளிட்ட பல்வேறு கோணங்களில் தீவிர விசாரணை மேற்கொண்டு வருகின்றனர்.