LATEST NEWS
காலையிலேயே பரபரப்பு..! முன்னாள் அமைச்சர் கே.என்.நேரு வீட்டில் லஞ்ச ஒழிப்புத்துறை மீண்டும் அதிரடிச் சோதனை..!!
திமுக முன்னாள் அமைச்சர் கே.என்.நேருவுக்கு சொந்தமான மற்றும் தொடர்புடைய இடங்களில் லஞ்ச ஒழிப்புத் துறையினர் இன்று அதிகாலை முதலே மீண்டும் அதிரடிச் சோதனையில் ஈடுபட்டு வருகின்றனர். முந்தைய திமுக ஆட்சிக் காலத்தில் நகராட்சி நிர்வாகத் துறையின் கீழ் உதவிப் பொறியாளர்கள், இளநிலைப் பொறியாளர்கள் உள்ளிட்ட சுமார் 2,538 அரசுப் பணியிடங்களை நிரப்பியதில் மற்றும் பல்வேறு ஒப்பந்தங்கள் (டெண்டர்கள்) வழங்கியதில் சுமார் ரூ.634 கோடி வரை லஞ்ச முறைகேடு நடந்ததாக எழுந்த புகாரின் அடிப்படையில் இந்த நடவடிக்கை தீவிரப்படுத்தப்பட்டுள்ளது. திருச்சி தில்லை நகரில் உள்ள அவரது இல்லம், சென்னையின் சில பகுதிகள் மற்றும் அவரது சகோதரர் ரவிச்சந்திரனின் இல்லம் உட்பட 20-க்கும் மேற்பட்ட இடங்களில் லஞ்ச ஒழிப்பு போலீசார் இந்தத் தீவிர சோதனையை மேற்கொண்டு வருகின்றனர்.
முன்னதாக, அமலாக்கத்துறை திரட்டிய ஆவணங்களின் அடிப்படையில் இந்த முறைகேடு தொடர்பாக வழக்குப் பதிவு செய்ய சென்னை உயர் நீதிமன்றம் உத்தரவிட்டிருந்தது. இந்த உத்தரவை எதிர்த்து கே.என்.நேரு தாக்கல் செய்திருந்த மறுஆய்வு மனுவை அண்மையில் அக்டோபர் 26-ஆம் தேதி உயர் நீதிமன்றம் தள்ளுபடி செய்து தீர்ப்பளித்தது. இதனைத் தொடர்ந்து, கடந்த செப்டம்பர் 5-ஆம் தேதி நடைபெற்ற முதற்கட்ட சோதனையின் தொடர்ச்சியாக, தற்போது கூடுதல் விவரங்கள் மற்றும் வங்கிப் பரிவர்த்தனை ஆவணங்களை திரட்டுவதற்காக இந்த இரண்டாம் கட்டச் சோதனை நடத்தப்பட்டு வருவதாகத் தகவல் வெளியாகியுள்ளது.
சென்னை உயர் நீதிமன்றத் தீர்ப்பை எதிர்த்து கே.என்.நேரு உச்ச நீதிமன்றத்தில் மேல்முறையீட்டு மனு தாக்கல் செய்துள்ளார். இந்த நிலையில், இந்த மனுவை உச்ச நீதிமன்றம் விசாரிக்கும் போது தங்களது தரப்பு வாதங்களையும் கேட்டறிந்த பின்னரே எந்தவொரு உத்தரவையும் பிறப்பிக்க வேண்டும் என்று கோரி தமிழக அரசு உடனடியாக உச்ச நீதிமன்றத்தில் கேவியட் மனு ஒன்றை தாக்கல் செய்துள்ளது. லஞ்ச ஒழிப்புத் துறையின் இந்த அடுத்தடுத்த சட்டப்பூர்வ நகர்வுகள் மற்றும் தீவிர சோதனைகள் காரணமாக கே.என்.நேரு எந்த நேரத்திலும் கைது செய்யப்படலாம் என்ற அரசியல் பரபரப்பு தமிழகத்தில் அதிகரித்துள்ளது.
