ஐயோ கொடுமையே.. ஓரே நொடியில் சிதைந்த குடும்பம்… ரயில் மோதி தாய் மற்றும் 3 பெண் குழந்தைகள் பரிதாப பலி.. உ.பி.யில் நடந்த கோர சம்பவம்..!!

உத்தரப் பிரதேச மாநிலம் பாராபங்கி மாவட்டத்தில் நிகழ்ந்த கோர ரயில் விபத்தில், ஒரே குடும்பத்தைச் சேர்ந்த தாய் மற்றும் அவரது மூன்று இளம் மகள்கள் பரிதாபமாக உயிரிழந்துள்ளனர். கோட்வாலி நகர் பகுதியின் காந்தி நகரைச் சேர்ந்த கிரண் தேவி பால் (39), அவரது 7 வயது இரட்டை மகள்களான கனிஷ்கா மற்றும் அனுஷ்கா, 5 வயது மகள் காவ்யா ஆகிய நால்வரும் ரயில் மோதியதில் சம்பவ இடத்திலேயே உயிரிழந்தனர். ஒரே நேரத்தில் நான்கு உயிர்கள் பறிபோன இந்தத் துயரச் சம்பவம் அப்பகுதி மக்களிடையே பெரும் சோகத்தை ஏற்படுத்தியுள்ளது.

கிரண் தேவியின் கணவர் ராம் தேஜ்பால் வனத்துறையில் ஊழியராகப் பணியாற்றி வருகிறார். விபத்து நடந்த நேரத்தில், இவர்களது மூத்த மகளான 12 வயது சிறுமி ரியா, தனது தந்தையுடன் சந்தைக்குச் சென்றிருந்ததால் இந்தத் துயரச் சம்பவத்திலிருந்து அதிர்ஷ்டவசமாக உயிர் தப்பியுள்ளார். தாயையும் மூன்று இளைய சகோதரிகளையும் ஒரே நேரத்தில் இழந்த ரியாவும், குடும்பத்தினரும் ஆறுதல்படுத்த முடியாத அளவிற்குக் கதறி அழுது வருவது பார்ப்போரைக் கண்கலங்க வைத்துள்ளது.

தகவலறிந்து சம்பவ இடத்திற்கு விரைந்து வந்த காவல்துறையினர், உயிரிழந்த நால்வரின் உடல்களையும் மீட்டுப் பிரேதப் பரிசோதனைக்காக மருத்துவமனைக்கு அனுப்பி வைத்தனர். கிரண் தேவியும் அவரது மூன்று மகள்களும் எதற்காக, எந்தச் சூழ்நிலையில் ரயில் தண்டவாளத்திற்குச் சென்றார்கள் என்பது குறித்துத் தற்போது தெளிவான தகவல்கள் இல்லை. இது விபத்தா அல்லது வேறு ஏதேனும் காரணமா என்பது குறித்து காவல்துறையினர் தீவிர விசாரணை நடத்தி வருகின்றனர்.