CRIME
ரூ.2,000 பணத்துக்காக இப்படியா..? 78 வயது பாட்டியைக் கொ**று மூட்டையில் கட்டி அணையில் வீசிய பேரன்.. விசாரணையில் அம்பலமான கொடூரம்..!!
கர்நாடக மாநிலம் பெலகாவி மாவட்டத்தில் உள்ள ஹுக்கேரி தாலுகாவுக்கு உட்பட்ட அரளிகட்டி கிராமத்தில் வசித்து வந்த 78 வயது மூதாட்டி ஹம்மவ்வா சனாடி, மாதந்தோறும் கிடைக்கும் சிறிய நிதியுதவிக்காகத் தனது சொந்தப் பேரனாலேயே கொலை செய்யப்பட்ட சம்பவம் பெரும் அதிர்ச்சியையும் வேதனையையும் ஏற்படுத்தியுள்ளது. பணத்துக்காக உறவுகளின் மதிப்பையும் மனிதநேயத்தையும் மறந்து நிகழ்ந்த இச்சம்பவம் அப்பகுதியில் கடும் பரபரப்பைக் கிளப்பியுள்ளது.
கர்நாடக அரசின் ‘கிருஹ லட்சுமி’ திட்டத்தின் கீழ், குடும்பத் தலைவிகளாக இருக்கும் தகுதியான பெண்களுக்கு மாதந்தோறும் ரூ.2,000 நிதியுதவி வழங்கப்பட்டு வருகிறது. அதன் அடிப்படையில் ஹம்மவ்வாவுக்கும் மாதந்தோறும் ரூ.2,000 கிடைத்து வந்துள்ள நிலையில், அந்தப் பணத்தைக் கேட்டு அவரது பேரன் பீமப்பா சனாடி தொடர்ந்து தொந்தரவு செய்து வந்ததாகப் போலீசார் தரப்பில் தெரிவிக்கப்பட்டுள்ளது.
பெண்கள் பொருளாதார ரீதியாகத் தன்னம்பிக்கையுடன் இருக்கவும் குடும்பச் செலவுகளுக்கு உதவவும் கொண்டுவரப்பட்ட இத்திட்டத்தின் மூலம் கிடைத்த தொகை, முதியவரின் உயிரையே பறிக்கும் அளவுக்குக் காரணமாக மாறியுள்ளது. இந்த நிலையில், கடந்த நவம்பர் 10ஆம் தேதி ஹம்மவ்வா திடீரெனக் காணாமல் போனதைத் தொடர்ந்து குடும்பத்தினர் அவரைத் தேடி வந்துள்ளனர்.
இதனிடையே, நவம்பர் 15ஆம் தேதி ஹிட்கல் அணையின் நீர்த்தேக்கப் பகுதியில் மூதாட்டியின் சடலம் கண்டெடுக்கப்பட்டதாகக் கிடைத்த தகவல்களின் அடிப்படையில், சடலத்தை மூட்டையில் கட்டி அணையில் வீசி கொலை செய்த வழக்கில் பேரன் பீமப்பா சனாடி தொடர்பான விவரங்கள் வெளிச்சத்துக்கு வந்துள்ளன.
