அய்யயோ என் புள்ள..! மகனுக்கு உயிர் கொடுத்து பிணமான தந்தை.. திருமண வீட்டில் மின்சாரம் பாய்ந்து பலியான சோகம்..!!

உத்தரப் பிரதேச மாநிலம் மொராதாபாத் மாவட்டத்தில், மின்சாரத் தாக்குதலில் சிக்கிய தனது ஐந்து வயது மகனைக் காப்பாற்றும் முயற்சியில், தந்தை தனது உயிரைத் தியாகம் செய்த நெஞ்சை உருக்கும் சம்பவம் நடந்துள்ளது. மொராதாபாத் மாவட்டம் பகத்பூர் காவல் நிலைய எல்லைக்குட்பட்ட கிராமத்தில், செவ்வாய்க்கிழமை மாலை ‘பூரா’ என்பவரது வீட்டில் திருமணத்திற்கு முந்தைய சடங்கு நிகழ்ச்சிகள் நடைபெற்று வந்தன. இதில் கலந்து கொள்வதற்காக ஃபரியாத் என்பவரின் மகன் சாகிப், தனது 5 வயது மகன் அபூபக்கருடன் வருகை தந்திருந்தார்.

அந்த விழாவில் ஏராளமான உறவினர்களும் கிராம மக்களும் கலந்துகொண்டதால் மகிழ்ச்சியான சூழல் நிலவியது. அப்போது, நிகழ்ச்சி நடைபெற்ற இடத்தின் சுவரோரமாக ஜெனரேட்டரிலிருந்து மின்சாரம் கொண்டு செல்லப்படும் மின்சாரக் கம்பிகள் திறந்த நிலையில் கிடந்துள்ளன. எதிர்பாராதவிதமாக, சிறுவன் அபூபக்கர் அந்த மின்சாரக் கம்பிகளைத் தொட்டதால், மின்சாரம் தாக்கி துடிக்கத் தொடங்கினான்.

இதைக் கண்ட தந்தை சாகிப், தனது உயிரைப் பற்றிச் சிறிதும் கவலைப்படாமல் துணிச்சலுடன் ஓடிச் சென்று, மின்சாரக் கம்பியிலிருந்து மகனைப் பாதுகாப்பாக இழுத்து மீட்டார். ஆனால், எதிர்பாராதவிதமாக சாகிப் கடுமையான மின்சார அதிர்ச்சிக்கு உள்ளாகி சம்பவ இடத்திலேயே சுருண்டு விழுந்தார். உடனடியாக அவரை மொராதாபாத்தில் உள்ள காஸ்மாஸ் மருத்துவமனைக்குக் கொண்டு சென்றபோதிலும், அவர் ஏற்கனவே இறந்துவிட்டதாக மருத்துவர்கள் தெரிவித்தனர். உழைத்து குடும்பத்தைக் காப்பாற்றி வந்த சாகிப்பிற்கு திருமணமாகி 6 ஆண்டுகள் ஆகும் நிலையில், அவருக்கு அபூபக்கர் மற்றும் அர்ஹாம் என்ற இரு மகன்கள் உள்ளனர். இந்த சோகமான சம்பவத்தால் திருமண வீடு துக்கத்தில் மூழ்கிய நிலையில், குடும்பத்தினர் காவல்துறையினரிடம் எந்தவித சட்டப்பூர்வ நடவடிக்கையும் எடுக்க வேண்டாம் என மறுத்துவிட்டனர்.