“பாதுகாக்க வேண்டியவரே இப்படி செய்யலாமா..?” புகார் அளிக்க வந்த பெண்ணைக் காவல் நிலையத்திற்குள்ளேயே சீரழித்த போலீஸ்.. அதிர்ச்சி சம்பவம்..!!

ஜார்கண்ட் மாநிலம் சராய்கேலா-கர்சவான் மாவட்டத்தில், குடும்பத் தகராறு குறித்து புகார் அளிக்க வந்த பெண்ணைக் காவல் நிலையத்திற்குள்ளேயே காவல் அதிகாரி ஒருவர் பாலியல் வன்கொடுமை செய்த கொடூரச் சம்பவம் நாடு முழுவதும் பெரும் அதிர்ச்சியை ஏற்படுத்தியுள்ளது. பாதிக்கப்பட்ட பெண்ணின் கூற்றுப்படி, புகாரைப் பெற்றுக்கொண்ட காவல்துறையினர் அன்றைய இரவு காவல் நிலைய அறையிலேயே தங்குமாறு அவரிடம் கூறியுள்ளனர். நள்ளிரவில் பணியில் இருந்த ஒரு காவல் அதிகாரி அந்த அறைக்குள் அத்துமீறி நுழைந்து, அப்பெண்ணைப் பாலியல் ரீதியாகத் துன்புறுத்தியுள்ளார். அப்பெண் பயந்து அலறியும் காவல் நிலையத்தில் இருந்த மற்றவர்கள் யாரும் உதவிக்கு வரவில்லை; இதனால் தற்காப்பிற்காக அங்கிருந்த கத்தியை எடுத்து அப்பெண் தாக்கியதில், அந்த அதிகாரியின் உடலில் காயம் ஏற்பட்டது.

மறுநாள் காலையில் இக்கொடூரம் குறித்து மற்ற காவல் அதிகாரிகளிடம் அப்பெண் முறையிட்டபோது, அவர்கள் வழக்கைத் திசைதிருப்ப அப்பெண்ணிற்குப் பணம் கொடுத்து அமைதியாக வீட்டுக்குச் செல்லுமாறு வற்புறுத்தியதாகக் கூறப்படுகிறது. இருப்பினும், இந்த விவகாரம் மாவட்ட உயர் அதிகாரிகளின் கவனத்திற்குச் சென்றதை அடுத்து, குற்றம் சாட்டப்பட்ட அந்தப் பாலியல் வெறி பிடித்த காவல் அதிகாரி அதிரடியாகக் கைது செய்யப்பட்டு காவலில் வைக்கப்பட்டுள்ளார். மேலும், கடமை தவறியது, அலட்சியப் போக்கு மற்றும் ஒழுங்கீனமாகச் செயல்பட்டது ஆகிய குற்றச்சாட்டுகளின் கீழ் சம்பந்தப்பட்ட காவல் நிலையப் பொறுப்பதிகாரி மற்றும் நான்கு காவலர்கள் உடனடியாகப் பணி இடைநீக்கம் செய்யப்பட்டுள்ளனர்.