“மக்கள் பணத்தில் இன்பச் சுற்றுலாவா..? தொழில்துறை அமைச்சர் எங்கே..?” முதல்வர் விஜய்யின் லண்டன் பயணம் குறித்து அதிமுக காரசாரக் கேள்வி..!!

முதலமைச்சராகப் பொறுப்பேற்ற பிறகு முதன்முறையாக அரசுமுறைப் பயணமாக இங்கிலாந்தின் லண்டன் நகரத்திற்குப் புறப்பட்டுச் சென்றுள்ள முதலமைச்சர் சி. ஜோசப் விஜய்யின் லண்டன் பயணம் குறித்துப் பிரதான எதிர்க்கட்சியான அதிமுக கடுமையான கேள்விகளை எழுப்பியுள்ளது. “இது மக்கள் பணத்தில் ஈர்க்கப்படும் தொழில் முதலீடா அல்லது இன்பச் சுற்றுலாவா?” என்று அதிமுகவின் தகவல் தொழில்நுட்பப் பிரிவு அறிக்கை வெளியிட்டு விமர்சித்துள்ளது.

முதலமைச்சரின் இந்த 8 நாட்கள் அரசுமுறைப் பயணத்தில் தமிழகத்திற்குப் புதிய தொழில் முதலீடுகளை ஈர்ப்பதே முதன்மை நோக்கம் எனத் அரசுத் தரப்பில் அதிகாரப்பூர்வமாகத் தெரிவிக்கப்பட்டுள்ளது. ஆனால், புதிய தொழில் திட்டங்களைப் பேசும் ஒரு முக்கியமான அரசுமுறைப் பயணத்தில், துறை சார்ந்த தொழில்துறை அமைச்சர் உடன் செல்லாதது ஏன் என அதிமுக தனது அறிக்கையில் கேள்வி எழுப்பியுள்ளது. தொழில்துறை அமைச்சரே இல்லாமல் என்ன மாதிரியான தொழில்களை முதலமைச்சர் தமிழகத்திற்கு ஈர்க்கப் போகிறார் என அவர்கள் சாடியுள்ளனர்.

மேலும், ஒரு மாநில முதலமைச்சரின் வெளிநாட்டுச் சுற்றுப்பயணம் குறித்த அறிவிப்பு வெளிப்படையாக முன்கூட்டியே அறிவிக்கப்படாமல், கடைசி நேரத்தில் நள்ளிரவில் ஏன் வெளியிடப்பட்டது என்றும் அதிமுக வினா எழுப்பியுள்ளது. உண்மையிலேயே வெளிநாட்டு முதலீடுகளை ஈர்க்கும் தூய்மையான நோக்கம் இருந்தால், இந்த அதிகாரப்பூர்வப் பயணத்தை மூடி மறைப்பது போல நள்ளிரவில் செய்திக்குறிப்பு வெளியிட வேண்டிய அவசியம் என்ன இருக்கிறது என்றும் அவர்கள் சாடியுள்ளனர்.