“அப்பா எங்களை சீக்கிரம் காப்பாத்துங்க..” சீட்டுக்கட்டாய் சரிந்த 4 மாடி கட்டிடம்.. தந்தைக்கு கைபேசி வழியே வந்த மரண ஓலம்… நெஞ்சை உலுக்கும் பின்னணி..!!

டெல்லி நியூ சீமாபுரி பகுதியில் புதன்கிழமை அன்று 25 கஜ மனையில் அமைந்திருந்த நான்கு மாடி கட்டிடம் ஒன்று திடீரென இடிந்து விழுந்து பெரும் விபத்துக்குள்ளானது. இந்த விபத்தின் தாக்கத்தால் அருகிலிருந்த மேலும் இரண்டு கட்டிடங்களும் பகுதியளவு சேதமடைந்ததால் அப்பகுதியில் பெரும் பரபரப்பும் பீதியும் ஏற்பட்டது. விபத்து நடந்த நேரத்தில் கட்டிடத்திற்கு வெளியே சிலர் குப்பைகளை அகற்றும் பணியில் ஈடுபட்டிருந்ததாகவும், குழந்தைகள் சிலர் அங்கு விளையாடிக்கொண்டிருந்ததாகவும் கூறப்படும் நிலையில், அருகிலிருந்த சிலரும் இந்த இடிபாடுகளுக்குள் சிக்கியிருக்கலாம் என அஞ்சப்படுகிறது.

விபத்து குறித்து தகவல் அறிந்ததும் நிர்வாகம், காவல்துறை மற்றும் மீட்புக் குழுவினர் சம்பவ இடத்திற்கு விரைந்து வந்து தீவிர நிவாரண மற்றும் மீட்புப் பணிகளைத் தொடங்கினர். இதுவரை ஒரு 3 வயதுக் குழந்தை உட்பட 7 பேர் இடிபாடுகளிலிருந்து பாதுகாப்பாக மீட்கப்பட்டு சிகிச்சைக்காக மருத்துவமனைக்கு அனுப்பப்பட்டுள்ளதாக ஷாஹ்தாரா மாவட்ட ஆட்சியர் அஜய் குமார் தெரிவித்துள்ளார். உள்ளூர் மக்களின் தகவல்படி, மேலும் 4 முதல் 5 பேர் இடிபாடுகளுக்கு அடியில் சிக்கியிருக்கலாம் என சந்தேகிக்கப்படும் நிலையில், கனமான இடிபாடுகளை அகற்றும் பணிகள் தொடர்ந்து நடைபெற்று வருகின்றன.

இந்த விபத்தின் மிக உருக்கமான சம்பவமாக, இடிபாடுகளுக்கு நடுவே சிக்கியுள்ள ஒரு பெண் தன் தந்தையைத் தொலைபேசியில் அழைத்து, தானும் தன் மகளும் உள்ளே உயிருடன் புதைந்திருப்பதாகவும், தங்களை விரைந்து மீட்குமாறும் கதறியுள்ளார். இடிபாடுகளுக்குள் இருப்பவர்களைத் தங்களின் கைபேசிகள் மூலம் தொடர்பு கொள்ள முடிவதாகக் கூறும் குடும்பத்தினர், தங்களைச் சம்பவ இடத்திற்குள் அனுமதிக்கவில்லை எனக் கவலை தெரிவிப்பதோடு, அவர்களைப் பத்திரமாக மீட்க மீட்புக் குழுவினரிடம் கண்ணீருடன் கோரிக்கை விடுத்து வருகின்றனர். முழுமையான மீட்புப் பணி முடிந்த பின்னரே விபத்தின் சேத விவரங்கள் முழுமையாகத் தெரியவரும்.