பகீர்.! வாடிக்கையாளர்களுக்கு தெரியாமல் மொபைல் எண்கள் மாற்றம்.. 10 கோடி ரூபாயை அள்ளிய வங்கி பெண் உதவியாளர் – புனேவில் சிக்கிய கூட்டாள..!!

உத்தரப் பிரதேச மாநிலம் கிரேட்டர் நொய்டாவில் உள்ள பஞ்சாப் நேஷனல் வங்கியில் (PNB) ₹10.24 கோடி மோசடி செய்யப்பட்ட வழக்கில், வங்கியின் பெண் அலுவலக உதவியாளர் தீபான்ஷி மற்றும் அவரது கூட்டாளி அசுதோஷ் குமார் பதக் ஆகியோரை மத்திய புலனாய்வு அமைப்பு கைது செய்துள்ளது. இவர்கள் இருவரும் வங்கியின் உயர் அதிகாரிகளின் கணினி உள்நுழைவு விவரங்களை சட்டவிரோதமாகப் பயன்படுத்தி இந்த பிரம்மாண்ட மோசடியை அரங்கேற்றியுள்ளதாகக் குற்றம் சாட்டப்பட்டுள்ளது.

குற்றம் சாட்டப்பட்ட இருவரும் வாடிக்கையாளர்களின் அனுமதியின்றி, அவர்களின் சேமிப்புக் கணக்குகள் மற்றும் நிலையான வைப்புத் தொகைகளில் இருந்து கோடிக்கணக்கான ரூபாய்களைப் பிற கணக்குகளுக்குப் பரிமாற்றம் செய்துள்ளனர். மேலும், வாடிக்கையாளர்களுக்குத் தங்களின் கணக்கில் இருந்து பணம் எடுக்கப்படும் பரிவர்த்தனை விவரங்கள் சென்று சேராமல் இருக்க, அவர்களின் மொபைல் எண்கள் மற்றும் மின்னஞ்சல் முகவரிகளையும் வங்கியின் கணினியில் மாற்றி முறைகேடு செய்துள்ளனர்.

இந்த மோசடி தொடர்பாகக் கடந்த அக்டோபர் 29-ஆம் தேதி சிபிஐ முறைப்படி வழக்குப் பதிவு செய்து விசாரணையைத் தொடங்கியது. இதில் கூட்டாளியான அசுதோஷ் மகாராஷ்டிர மாநிலம் புனேவில் வைத்து கைது செய்யப்பட்டு, நீதிமன்ற அனுமதியுடன் டெல்லிக்கு அழைத்து வரப்பட்டுள்ளார். இந்த வங்கி மோசடி குறித்து சிபிஐ அதிகாரிகள் தொடர்ந்து தீவிர விசாரணை நடத்தி வருகின்றனர்.