அடச்சீ..! யார் செஞ்ச வேலை இது..? பிஞ்சு குழந்தைகள் குடிக்கும் நீரில் மனிதக் கழிவு.. தமிழகத்தையே உலுக்கிய பழனி பள்ளி சம்பவம்..!!

திண்டுக்கல் மாவட்டம் பழனி அருகே மானூர் ஊராட்சி ஒன்றிய தொடக்கப்பள்ளியில் உள்ள குடிநீர் மேல்நிலைத் தொட்டியில், சமூக விரோதிகள் சிலர் மனிதக் கழிவை கலந்த அதிர்ச்சிச் சம்பவம் வெளிச்சத்திற்கு வந்துள்ளது. தொடர் விடுமுறை முடிந்து கடந்த அக்டோபர் 5-ஆம் தேதி பள்ளி மீண்டும் திறக்கப்பட்டபோது, வளாகத்தைத் தூய்மை செய்யும் பணியில் ஈடுபட்டிருந்த ஊழியர்கள் குடிநீர் தொட்டியில் மலம் கலக்கப்பட்டிருப்பதை எண்ணி அதிர்ச்சியடைந்தனர். மாணவர்களின் பாதுகாப்பைக் கருதி உடனடியாக அந்தத் தொட்டி சுத்தம் செய்யப்பட்ட போதிலும், இந்த விவகாரம் நேற்று (அக்டோபர் 7) பெற்றோர்களுக்குத் தெரியவந்ததையடுத்து அவர்கள் பள்ளியை முற்றுகையிட்டுப் போராட்டத்தில் ஈடுபட்டனர்.

இவ்வளவு பெரிய மற்றும் ஆபத்தான அநீதி நடந்தும், இதுகுறித்து காவல்துறைக்கோ அல்லது கல்வித்துறை அதிகாரிகளுக்கோ தெரிவிக்காமல் உண்மையை மறைக்க முயன்றதாகப் பள்ளியின் தலைமை ஆசிரியர் ஜெயக்குமார் மீது பெற்றோர்கள் குற்றம் சாட்டினர். தகவல் அறிந்து சம்பவ இடத்திற்கு விரைந்து வந்த கீரனூர் போலீசார் நடத்திய முதற்கட்ட விசாரணையில் இச்சம்பவம் உண்மை என்பது உறுதியானது. இக்கொடூரச் செயலில் ஈடுபட்ட மர்ம நபர்களைக் கண்டறியும் நோக்கில், தலைமை ஆசிரியர் அளித்த புகாரின் பேரில் போலீசார் அடையாளம் தெரியாத நபர்கள் மீது எப்.ஐ.ஆர் பதிவு செய்து தீவிர விசாரணை மேற்கொண்டு வருகின்றனர்.