“முதல்வர் வாக்குறுதி என்னாச்சு..?” ஆஷா பணியாளர்கள் தீவிர போராட்டம்.. பெண்கள் என்றும் பார்க்காமல் காவல்துறை செய்த அராஜகம்.. சட்டசபை வாசலில் பரபரப்பு..!!

தெலங்கானாவில் காங்கிரஸ் கட்சி ஆட்சிக்கு வந்தால் ஆஷா பணியாளர்களுக்கு ரூ.18,000 நிலையான மாதச் சம்பளம் மற்றும் சுகாதார அட்டைகள் வழங்கப்படும் என்று தற்போதைய முதல்வர் அ. ரேவந்த் ரெட்டி அளித்த வாக்குறுதிகள் இன்னும் நிறைவேற்றப்படவில்லை எனக் கூறி, ஆஷா பணியாளர்கள் ஹைதராபாத்தில் தீவிரப் போராட்டத்தில் ஈடுபட்டுள்ளனர். இதுகுறித்துத் தங்களது ஆதங்கத்தை வெளிப்படுத்தியுள்ள ஆஷா பணியாளர் ஷோபரணி, “வாக்குறுதி அளித்தபடி சம்பளமும் உயர்த்தப்படவில்லை, மருத்துவக் காப்பீட்டு அட்டைகளும் வழங்கப்படவில்லை. முந்தைய பிஆர்எஸ் அரசு உயர்த்தி வழங்கிய ரூ.9,900 சம்பளம் மட்டுமே தற்போதும் கிடைத்து வருகிறது” என்று குற்றம் சாட்டியுள்ளார். காங்கிரஸ் அரசு தங்களை ஏமாற்றிவிட்டதாகக் குறிப்பிட்டுள்ள அவர், தங்களின் அடிப்படை வாழ்வாதாரக் கோரிக்கைகளுக்காகத் தொடர்ந்து குரல் கொடுத்து வருவதாகத் தெரிவித்துள்ளார்.

சட்டமன்ற கூட்டத்தொடர் நடைபெறும் வேளையில் தங்களின் நியாயமான கோரிக்கைகளுக்காக அமைதி வழியில் போராடியபோது, காவல்துறையினர் தங்களைப் பெண்கள் என்றும் பாராமல் மிகவும் கொடூரமான முறையில் தெருக்களில் இழுத்துச் சென்று தாக்கியதாகப் பணியாளர்கள் வேதனை தெரிவித்துள்ளனர். இந்த அராஜகப் போலீஸ் தடியடி மற்றும் கைது நடவடிக்கைகளுக்குப் பயந்து பின்வாங்கப் போவதில்லை என்று முழங்கியுள்ள ஷோபரணி, எத்தனை தடைகள் வந்தாலும் தங்களின் கோரிக்கைகள் முழுமையாக நிறைவேறும் வரையிலும், தங்களுக்கு உரிய நீதி கிடைக்கும் வரையிலும் இந்த வாழ்வாதாரப் போராட்டத்தை நிறுத்தப் போவதில்லை என்று திட்டவட்டமாகத் தெரிவித்துள்ளார்.