24 வருஷம் போலீஸ் வேலை… ஆனா சொத்து மதிப்பு மட்டும் ரூ.30 கோடியா..?! ஹெட் கான்ஸ்டபிள் வீட்டில் லோக்யுக்தா அதிரடி ரெய்டு..!!

மத்தியப் பிரதேச மாநிலம் இந்தூர் காவல் பயிற்சி மையத்தில் ஹெட் கான்ஸ்டபிளாகவும் ஓட்டுநராகவும் பணியாற்றி வரும் ஃபிரோஸ் கான் என்பவரின் இருப்பிடங்களில் லோக்யுக்தா அமைப்பினர் புதன்கிழமை அதிரடி சோதனை நடத்தினர். 2002-ஆம் ஆண்டு காவல் துறையில் பணியில் சேர்ந்த ஃபிரோஸ் கானின் 24 ஆண்டு காலப் பணியில் ஈட்டிய மொத்த சம்பளம் சுமார் ரூ.75 லட்சம் என மதிப்பிடப்பட்டுள்ள நிலையில், அவரிடம் ரூ.30 கோடிக்கும் அதிகமான சொத்துக்கள் இருப்பது ஆரம்பக்கட்ட சோதனையில் தெரியவந்துள்ளது. இந்த மிகப்பெரிய வருமானத்திற்கு அதிகமான சொத்துக்கள் எவ்வாறு சேர்ந்தன என்பது குறித்து லோக்யுக்தா அதிகாரிகள் தீவிர விசாரணை நடத்தி வருகின்றனர்.

லோக்யுக்தா சோதனையின் போது ஃபிரோஸ் கானுக்குச் சொந்தமான 33 சொத்து ஆவணங்கள், 9 வாகனங்களின் பத்திரங்கள் மற்றும் 21 வங்கி கணக்குகள் தொடர்பான தகவல்கள் கண்டறியப்பட்டுள்ளன. இவை இந்தூர், தேவாஸ் மற்றும் உஜ்ஜைன் ஆகிய நகரங்களில் பரவியுள்ளன. மேலும், ஃபிரோஸ் கான் தனது மனைவி மற்றும் தாயார் பெயரில் டிரேடிங் கம்பெனி மற்றும் முதலீட்டு நிறுவனங்களை நடத்தி வந்ததும், தனது காதலி பெயரிலும் சொத்துக்களை வாங்கியிருந்ததும் தெரியவந்துள்ளது. இந்த நிறுவனங்களின் வங்கிப் பரிவர்த்தனைகள் மற்றும் பங்குச்சந்தை முதலீடுகள் குறித்தும் அதிகாரிகள் ஆய்வு செய்து வருகின்றனர்.

கடந்த சில ஆண்டுகளாகப் பணிக்குச் செல்லாமல் தலைமறைவாக இருந்ததாகக் கூறப்படும் ஃபிரோஸ் கான், காவல் துறையில் தனக்கிருந்த செல்வாக்கைப் பயன்படுத்தி சர்ச்சைக்குரிய நில தகராறுகளைத் தீர்த்து வைப்பதில் ஈடுபட்டதாகக் குற்றச்சாட்டுகள் எழுந்துள்ளன. பங்குச்சந்தை முதலீடுகள் மற்றும் முதலீட்டு நிறுவனங்கள் மூலம் கிடைத்த வருமானத்திற்கான ஆதாரங்கள் குறித்து லோக்யுக்தா முழுமையாகச் சரிபார்த்து வருகிறது. இந்த விரிவான விசாரணை முடிவடைந்த பின்னரே, அவரது மொத்த அநியாயச் சொத்துக்களின் துல்லியமான மதிப்பும், அவர் மீதான அடுத்தகட்ட சட்ட நடவடிக்கைகளும் தெளிவாகும்.