“ஒரே நேரத்தில் 3 பேரை கொல்வது எப்படி..?” 52 லட்சம் கடன்… AI-யிடம் கொடூர பிளான்… காதலியின் பெற்றோர், தங்கையை வெட்டிச் சாய்த்த ‘சைபர் சைக்கோ’ காதலன்..!!

பெங்களூரு கே.ஆர்.புரம் சீகேஹள்ளியில் கடந்த ஜூன் 22 அன்று நடந்த ஒரே குடும்பத்தைச் சேர்ந்த மூன்று பேர் கொலை செய்யப்பட்ட கொடூரச் சம்பவத்தின் பின்னணியில், பணம் மற்றும் தீவிரக் கடனாளியான ஐடி ஊழியர் பெற்ற அழுத்தம் காரணம் என்பது 2,085 பக்கங்கள் கொண்ட குற்றப்பத்திரிகையில் தெரியவந்துள்ளது. 25 வயதான தொழில்நுட்ப ஊழியரான ஜே. கென்னத் என்ற தனது லிவ்-இன் துணைகாக, ஸ்வேதா என்ற பெண் ஒரே ஆண்டில் மொத்தம் ரூ.52 லட்சம் கடன் வாங்கியுள்ளார். இதில் ரூ.30 லட்சம் தொழில்கடன், ரூ.14 லட்சம் தனிநபர் கடன்கள் மற்றும் ரூ.8 லட்சம் உறவினர்கள், நண்பர்களிடம் பெறப்பட்ட கடனாகும்.

கடன் தவணைகள் சரியாகச் செலுத்தப்படாததால், தொழில் கடன் அளித்த வங்கி ஸ்வேதாவின் பெற்றோர் வீட்டிற்கு நோட்டீஸ் அனுப்பியது. இதன் மூலமே ஸ்வேதாவின் தந்தை சோமசுந்தர் (55) மற்றும் தாய் முத்துலட்சுமி (50) ஆகியோருக்கு தங்கள் மகள் கென்னத்திற்காக இவ்வளவு பெரிய தொகையைக் கடனாகப் பெற்றுள்ளது தெரியவந்தது. இதனால் அதிர்ச்சியடைந்த சோமசுந்தர், கென்னத்திடம் பணத்தை என்ன செய்தார் என்றும், நிலுவைத் தொகைகளுக்காக ஏன் வீட்டிற்கு வங்கி நோட்டீஸ்கள் வருகின்றன என்றும் கோபமாகக் கேட்டு முறையிட்டுள்ளார்.

இந்த வாக்குவாதம் முற்றிய நிலையில், ஜூன் 22 ஆம் தேதி இரவு சீகேஹள்ளியில் உள்ள ‘சாய் க்ரீன் அபார்ட்மெண்ட்’ குடியிருப்பில் கென்னத் கொடூர தாக்குதலில் ஈடுபட்டார். சோமசுந்தர், முத்துலட்சுமி மற்றும் அவர்களின் 20 வயது இளைய மகள் சுப்ரியா ஆகிய மூவரையும் கென்னத் கத்தியால் கடுமையாகத் தாக்கினார். படுகாயமடைந்த சோமசுந்தர் தப்பித்து படிக்கட்டு பகுதிக்கு வந்து, பாதுகாப்பு ஊழியர்களிடம் கென்னத் தனது மனைவியையும் மகளையும் தாக்குவதாகக் கூறி மயங்கி விழுந்தார். மருத்துவமனைக்குக் கொண்டு செல்லப்பட்டபோதிலும் மூவரும் பரிதாபமாக உயிரிழந்தனர்.

இக்கொலைச் சம்பவத்திற்கு முன்பாக கென்னத் தனது மடிக்கணினியில் செயற்கை நுண்ணறிவை பயன்படுத்தித் தாக்குதல் நடத்தும் வழிகளைத் தேடியது தடையியல் சோதனையில் தெரியவந்துள்ளது. சமையலறை கத்தியால் உயிரைப் பறிப்பது எப்படி, வினிகர் மற்றும் மிளகாய்த்தூள் கலவையால் கண் பார்வையை பறிப்பது எப்படி, ஒரே நேரத்தில் மூன்று பேரைத் தாக்குவது எப்படி போன்ற அதிர்ச்சிகரமான கேள்விகளை AI-யிடம் அவர் கேட்டுள்ளார். மேலும் வங்கிக் கடன் தொல்லையிலிருந்து தப்பிப்பது மற்றும் திவால் நிலையை அறிவிப்பது குறித்தும் அவர் தேடியுள்ளார்.

குற்றவாளி கென்னத் கூகுள் மற்றும் செயற்கை நுண்ணறிவை ஒரு நண்பனைப் போலப் பயன்படுத்தித் திட்டமிட்டுள்ளான் என்றும், சமூக அறிவு மிகவும் குறைவாக இருந்ததால் இத்தகைய கொடூர முடிவை எடுத்திருக்கலாம் என்றும் காவல்துறை அதிகாரி தெரிவித்துள்ளார். குற்றச்சம்பவம் நடந்த இடத்தில் மிளகாய்த்தூள் மற்றும் வினிகர் கலந்த பாட்டில் ஒன்றைக் காவல்துறையினர் கைப்பற்றித் தடையியல் சோதனைக்கு அனுப்பி வைத்துள்ளனர். இந்த வழக்கில் கென்னத்திற்கு எதிராகப் வலுவான ஆதாரங்களுடன் குற்றப்பத்திரிகை நீதிமன்றத்தில் தாக்கல் செய்யப்பட்டுள்ளது.