“பாவம் மனுஷன் நைட்டெல்லாம் தூங்கல” மேடையிலேயே தூக்கத்தை கட்டுப்படுத்த முடியாமல் திணறிய அமைச்சர் ஆனந்த்…. இணையத்தில் தீயாய் பரவும் வீடியோ…!!

மதுரையில் நடைபெற்ற வடகிழக்கு பருவமழை முன்னேற்பாடுகள் குறித்த ஆலோசனைக் கூட்டத்தில், தீராத உடல் சோர்வு காரணமாக அமைச்சர் என். ஆனந்த் மேடையிலேயே தூக்கத்தைக் கட்டுப்படுத்த முடியாமல் தவித்த வீடியோ சமூக வலைதளங்களில் வைரலாகி வருகிறது. தமிழகத்தில் பருவமழை தீவிரமடைந்து வரும் நிலையில், மதுரை உள்ளிட்ட 15 தென் மாவட்டங்களுக்கான அவசரப் பணிகள் மற்றும் பாதுகாப்பு நடவடிக்கைகள் குறித்து விவாதிக்க இந்த முக்கிய மாநாடு நடைபெற்றது.

இந்த ஆய்வுக் கூட்டத்திற்குத் தலைமை தாங்கி, அரசு அதிகாரிகளுடன் அமைச்சர் தீவிர ஆலோசனையில் ஈடுபட்டார். நீண்ட நேரமாக கூட்டம் நடைபெற்றுக் கொண்டிருந்தபோது, மேடையில் அமர்ந்திருந்த அமைச்சர் ஆனந்த் திடீரென ஏற்பட்ட கடும் அசதியால் கண் அயரத் தொடங்கினார். அதிகாரிகள் பருவமழை தயாரிப்புகள் குறித்து விளக்கிக் கொண்டிருந்த வேளையில், அவர் தனது பாரமான இமைகளைத் தூக்க முடியாமல் சொக்கி விழுவதும், பின்னர் திடுக்கிட்டு சுதாரிப்பதுமாக இருந்த காட்சிகள் அங்கிருந்த கேமராக்களில் பதிவாகின.

அமைச்சர் தூங்கும் இந்த வீடியோ இணையத்தில் நெட்டிசன்களிடையே கலவையான விவாதங்களைக் கிளப்பியுள்ளது. முக்கிய அதிகாரிகள் கூட்டத்தில் அமைச்சர் இவ்வாறு தூங்குவது முறையா எனச் சிலர் விமர்சித்தாலும், பெரும்பாலான மக்கள் அமைச்சருக்கு ஆதரவாகவே கருத்து தெரிவித்து வருகின்றனர். கடந்த சில நாட்களாகப் பெய்து வரும் கனமழையால், இரவு முழுவதும் களத்தில் நின்று அவர் பணிகளை மேற்பார்வையிட்ட களைப்பால் இவ்வாறு சோர்வடைந்திருக்கலாம் என்றும், அவரும் மனிதர்தானே என்றும் நெட்டிசன்கள் பதிவிட்டு வருகின்றனர்.