மீண்டும் ஒரு கொடிய நோய் பரவுகிறதா..?ரஷிய ஆய்வகத்தில் பெண் விஞ்ஞானி மர்ம மரணம்… பதற வைக்கும் பின்னணி..!!

ரஷியாவின் சைபீரியாவில் உள்ள இர்குட்ஸ்க் பிளேக் தடுப்பு ஆராய்ச்சி நிறுவனத்தில் பணியாற்றிய தர்யா ஷிபிலோவா (28) என்ற பெண் ஆய்வாளர், கடுமையான நோய் பாதிப்பால் உயிரிழந்த சம்பவம் பெரும் பரபரப்பை ஏற்படுத்தியுள்ளது. கடந்த செப்டம்பர் 29-ஆம் தேதி கடுமையான நிமோனியா அறிகுறிகளுடன் மருத்துவமனையில் அனுமதிக்கப்பட்ட அவருக்குச் செயற்கை சுவாசக் கருவி பொருத்தப்பட்ட நிலையிலும், இரண்டு நாட்களுக்குப் பிறகு அவர் உயிரிழந்தார். அவரது உடல்நிலையை “அறியப்படாத காரணத்தால் ஏற்பட்ட நிமோனியா” எனக் குறிப்பிட்டுள்ள ரஷியாவின் பொது சுகாதாரக் கண்காணிப்பு அமைப்பு, அவர் பணிபுரிந்த துறையுடன் தொடர்புடைய நுண்ணுயிரிகள் எதுவும் அவரது உடலில் கண்டறியப்படவில்லை என்று தெரிவித்துள்ளது.

மருத்துவர்களிடம் உயிருள்ள பாக்டீரியாக்கள் இருந்த சோதனைக் குழாய் ஒன்று தற்செயலாக உடைந்ததாக அவர் தெரிவித்ததாகச் சில ஊடகங்கள் செய்தி வெளியிட்டுள்ளதால், ஆய்வகத்தில் விபத்து ஏதேனும் நிகழ்ந்ததா என்ற கேள்வி எழுந்துள்ளது. இதனிடையே, முன்னெச்சரிக்கை நடவடிக்கையாக அவருடன் தொடர்பில் இருந்ததாகக் கருதப்படும் சுமார் 200 பேர் ஷெலெகோவ் மருத்துவமனையில் தனிமைப்படுத்தப்பட்டு மருத்துவக் கண்காணிப்பில் வைக்கப்பட்டுள்ளனர். எனினும், கண்காணிப்பில் உள்ள எவருக்கும் நோய் அறிகுறிகள் தென்படவில்லை என்றும், அவர்களிடம் மேற்கொள்ளப்பட்ட பரிசோதனைகள் அனைத்தும் எதிர்மறையாகவே வந்துள்ளன என்றும் இர்குட்ஸ்க் கவர்னர் இகோர் கோப்செவ் தெரிவித்துள்ளார்.

இந்த மரணத்துக்குப் பிளேக் நோய் காரணமா என்ற கேள்வி எழுந்துள்ள நிலையில், ரஷிய சுகாதாரக் கண்காணிப்பு அமைப்பு இதுவரை அதை உறுதி செய்யவில்லை. மேலும், முன்னாள் சுகாதார அதிகாரியான ஜெனடி ஒனிஷ்செங்கோ இந்தத் தொற்று பிளேக் நோயாக இருப்பதற்கான வாய்ப்பு குறைவு எனக் கூறியுள்ளார். நிலைமையை நேரில் கண்காணிப்பதற்காக ரஷியாவின் தலைமை அரசு சுகாதார அதிகாரி அன்னா போபோவா மாஸ்கோவிலிருந்து சைபீரியா சென்றுள்ள நிலையில், பல்வேறு முரண்பட்ட தகவல்கள் வெளியாவதால் பொதுமக்கள் வதந்திகளை நம்ப வேண்டாம் என்றும் அதிகாரப்பூர்வ தகவல்களை மட்டுமே நம்ப வேண்டும் என்றும் உள்ளூர் நிர்வாகம் அறிவுறுத்தியுள்ளது.