“என்னப்பா சொல்றீங்க… கிட்ட போனா ஆடு மாயமா மறைஞ்சிடுதா..?” குல்லு ஜோக்னி மாதா கோவிலில் நடக்கும் அதிசயம்..! இணையத்தில் வைரலாகும் வீடியோ..!!

இமாச்சலப் பிரதேசத்தின் குல்லு மாவட்டத்தில் உள்ள ஜீரி பகுதியில் அமைந்துள்ள ஜோக்னி மாதா கோவிலில் இருந்து ஒரு விசித்திரமான சம்பவம் வெளிச்சத்திற்கு வந்துள்ளது. இக்கோவில் வளாகத்திற்கு அருகே கடந்த மூன்று மாதங்களாகத் தொடர்ச்சியாகக் காணப்படும் ஒரு ஆடு, தற்போது அப்பகுதி மக்கள் மற்றும் சமூக வலைதளப் பயனர்களிடையே பெரும் ஆச்சரியத்தையும் நம்பிக்கையையும் ஏற்படுத்தியுள்ளது. வழக்கமாக கால்நடைகள் ஓரிடத்திலிருந்து மற்றொரு இடத்திற்கு இடம்பெயர்ந்து கொண்டிருக்கும் சூழலில், இந்த ஆடு கடந்த 3 மாதங்களாகத் தொடர்ச்சியாக ஒரே இடத்தில் முகாமிட்டு இருப்பது அனைவரையும் வியப்பில் ஆழ்த்தியுள்ளது.

கிராம மக்களின் கூற்றுப்படி, இந்த ஆடு தினமும் மாலை 7 மணியளவில் வெளியே வந்து, அதிகாலை 5 மணியளவில் மீண்டும் அதே குறிப்பிட்ட இடத்திற்குச் சென்று அமர்ந்து கொள்கிறது. பகல் நேரத்தில் இக்கோவில் வளாகத்தைச் சுற்றியே உலா வருகிறது. சிலர் இந்த ஆடு இரவில் புல் மேய்வதாகக் கூறுகின்றனர், ஆனால் பல நேரில் பார்த்தவர்கள் இந்த ஆடு இதுவரை எதையும் சாப்பிட்டோ அல்லது குடித்தோ அவர்கள் பார்த்ததே இல்லை எனக் கூறுகின்றனர். இத்தகைய வழக்கத்திற்கு மாறான செயலால், பக்தர்கள் இதை ஒரு தெய்வீக நிகழ்வாகவும் “மாதாவின் தரிசனமாகவும்” கருதுகின்றனர்.

இந்தச் சம்பவத்தை மேலும் சுவாரசியமாக்கும் வகையில், வீதியால் சென்ற சிலர் இந்த ஆட்டை தூரத்திலிருந்து பார்த்துவிட்டு, அதை நெருங்கிப் பிடிக்க அல்லது பார்க்க முயன்றபோது, அது கண்ணிமைக்கும் நேரத்தில் அவர்களின் கண்களுக்கு முன்பாகவே மாயமாய் மறைந்துவிட்டதாகத் தெரிவிக்கின்றனர். சமூக வலைதளங்களில் ‘The Modern Himachal’ என்ற கணக்கிலும் இதன் வீடியோ வெளியாகி வைரலாகி வருகிறது. இதைத் தொடர்ந்து, கோவிலுக்கு வரும் பக்தர்கள் இந்த ‘மர்ம’ ஆட்டைக் காண்பதற்காகவும் பெருமளவில் திரளத் தொடங்கியுள்ளனர்.