“வழக்கு போட்டவருக்கு பேரதிர்ச்சி.. தத்துப்பிள்ளைக்குச் சொத்து கிடையாது என சவால்… அலகாபாத் உயர் நீதிமன்றம் கொடுத்த மரண அடி!”

கணவர் இறந்த பிறகு ஒரு விதவை ஒரு குழந்தையைத் தத்தெடுத்தால், அக்குழந்தை இறந்த கணவரின் தத்துப்பிள்ளையாகக் கருதப்பட்டு, அவரது சொத்தில் பங்கு பெற முழு உரிமையுடையவர் என்று அலகாபாத் உயர் நீதிமன்ற நீதிபதி சந்திர குமார் ராய் தீர்ப்பளித்துள்ளார். பிரயாக்ராஜைச் சேர்ந்த ராம் கிருபால் என்பவரால் 1983-ல் தாக்கல் செய்யப்பட்ட மனுவைத் தள்ளுபடி செய்து நீதிமன்றம் இந்த உத்தரவைப் பிறப்பித்தது. ரசௌலி கிராமத்திலுள்ள முரளிதர் என்பவரின் சொத்தில், அவரது மனைவி மோதி ராணியால் தத்தெடுக்கப்பட்ட ராம்ஜி என்ற மகனுக்கு வாரிசுரிமை வழங்கி ஒருங்கிணைப்பு அதிகாரி பிறப்பித்த உத்தரவை எதிர்த்து ராம் கிருபால் வழக்கு தொடர்ந்திருந்தார்.

முரளிதர் பிள்ளைகள் ஏதுமின்றி இறந்த நிலையில், அவரது சொத்துக்கள் மனைவி மோதி ராணிக்கு வந்தடைந்தன. தொடர்ந்து, 1960 ஆம் ஆண்டு ஆகஸ்ட் 2 ஆம் தேதி மோதி ராணி தன்னைச் சட்டப்பூர்வமாகத் தத்தெடுத்ததாகவும், இதனால் முரளிதரின் சொத்துக்குத் தான் வாரிசாவதாகவும் ராம்ஜி குறிப்பிட்டார். இதன் அடிப்படையில் ரசௌலி கிராமத்திலுள்ள கணக்கு எண் 96-ல் ராம்ஜியின் பெயர் முரளிதரின் வளர்ப்பு மகனாகப் பதிவு செய்யப்பட்டது. இந்த பதிவை எதிர்த்தே ராம் கிருபால் மனுத் தாக்கல் செய்திருந்தார்.

இவ்வழக்கை விசாரித்த உயர் நீதிமன்றம், ‘சாவன் ராம் எதிர் கலாவந்தி’ மற்றும் ‘சுபாஷ் மிசிர்’ ஆகிய வழக்குகளில் உச்ச நீதிமன்றம் அளித்த முன்னோடி தீர்ப்புகளை மேற்கோள் காட்டியது. ஒரு விதவையால் தத்தெடுக்கப்பட்ட மகன், அவளது மறைந்த கணவரின் மகனாகவே கருதப்படுவார் என்றும், விதவையின் மரணத்திற்குப் பின் அவரே அச்சொத்தின் சட்டப்பூர்வ வாரிசாவார் என்றும் நீதிமன்றம் சுட்டிக்காட்டியது. இதன் அடிப்படையில், ஒருங்கிணைப்பு அதிகாரிகளின் முடிவில் எந்தச் சட்டவிரோதமும் இல்லை எனக் கூறி, ராம் கிருபாலின் மனுவைத் தள்ளுபடி செய்த உயர் நீதிமன்றம், ராம்ஜியை முரளிதரின் மகனாக அங்கீகரித்து சொத்துரிமையை உறுதி செய்தது.