எம்.எல்.ஏ-வா இருந்தா என்ன..? ரூ.3 லட்சம் கரண்ட் பில் பாக்கி… அசால்ட்டாக ஃபியூஸ் பிடுங்கிய மின்சாரத் துறை..! சத்தீஸ்கரில் பரபரப்பை ஏற்படுத்திய கரண்ட் கட்..!!

சத்தீஸ்கர் மாநிலம் தந்தேவாடா மாவட்டத்தில் மின்சாரத் துறை எடுத்த அதிரடி நடவடிக்கை தற்போது பெரும் விவாதப் பொருளாக மாறியுள்ளது. நீண்ட நாட்களாக மின் கட்டணம் செலுத்தாததால், தந்தேவாடா தொகுதி பாஜக சட்டமன்ற உறுப்பினர் சைத்ராம் அதாமியின் கீதம் பகுதியில் உள்ள குடியிருப்புக்கான இரண்டு மின் இணைப்புகளையும் மின்சாரத் துறை துண்டித்துள்ளது. இந்த இரண்டு இணைப்புகளிலும் சேர்த்து சுமார் 3 லட்சம் ரூபாய் மின் கட்டணம் பாக்கியாக உள்ளது குறிப்பிடத்தக்கது.

தகவல்களின்படி, கீதம் பகுதியில் எம்.எல்.ஏ தங்க பயன்படுத்தப்பட்டு வரும் இந்த கட்டிடம் உண்மையில் வனத்துறையின் ஓய்வு விடுதியாகும். தந்தேவாடா ஒரு நக்சல் பாதிக்கப்பட்ட பகுதி என்பதால், எம்.எல்.ஏ-வின் சுற்றுப்பயணம் மற்றும் பாதுகாப்பு அம்சங்களை கருத்தில் கொண்டு இந்த ஓய்வு விடுதி அவருக்கு ஒதுக்கப்பட்டுள்ளது. இங்கு மொத்தம் இரண்டு மின் மீட்டர்கள் உள்ளன; இதில் சிங்கிள் ஃபேஸ் மீட்டரில் 2023-ஆம் ஆண்டிலிருந்தே கட்டணம் செலுத்தப்படாததால் சுமார் 2.30 லட்சம் ரூபாயும், த்ரீ ஃபேஸ் மீட்டரில் கடந்த ஒரு வருடமாக கட்டணம் செலுத்தப்படாததால் 50,250 ரூபாய்க்கு மேலும் பாக்கி நிலுவையில் இருந்தது.

இந்த விவகாரத்தில் மின் மீட்டர் யார் பெயரில் உள்ளது என்பதில் வனத்துறைக்கும் மின்சாரத் துறைக்கும் இடையே கருத்து வேறுபாடுகள் உள்ளன. ஒரு மீட்டர் ‘குன்வர்’ என்பவரின் பெயரிலும், மற்றொரு மீட்டர் எம்.எல்.ஏ பெயரிலும் இருப்பதாக தகவல்கள் தெரிவிக்கின்றன. மின்சாரத் துறை உதவிப் பொறியாளர் அவினாஷ் லக்ரா இது குறித்துக் கூறுகையில், நீண்ட நாட்களாக நிலுவைத் தொகை செலுத்தப்படாததால் விதிகளின்படியே மின் இணைப்பு துண்டிக்கப்பட்டதாக உறுதிப்படுத்தியுள்ளார். எனினும், இந்த சம்பவம் குறித்து எம்.எல்.ஏ சைத்ராம் அதாமி தரப்பிலிருந்து இதுவரை எந்த அதிகாரப்பூர்வ விளக்கமும் அளிக்கப்படவில்லை.