“அவரை நீக்கினா அரசு கவிழ்ந்துடுமா..?” உப்பு தின்னவன் தண்ணி குடிச்சி தான் ஆகணும்… நீட் முறைகேடு விவகாரத்தில் கல்வி அமைச்சர் தர்மேந்திர பிரதானை தூக்க பிரதமர் மோடிக்கு பெ. சண்முகம் அதிரடி டிமாண்ட்…!!

நீட் தேர்வு முறைகேடுகளுக்கு எதிராக மாணவர்கள் நடத்தி வரும் தொடர் போராட்டங்களை ஒடுக்குவதற்காக, மத்திய அரசு மேற்கொண்டு வரும் நடவடிக்கைகளுக்கு மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பெ. சண்முகம் தனது கடுமையான கண்டனத்தைப் பதிவு செய்துள்ளார். மாணவர்கள் தங்களின் நியாயமான கோரிக்கைகளுக்காகப் போராடி வரும் நிலையில், அவர்களின் குரலுக்குச் செவிசாய்க்காமல் ஆயிரக்கணக்கான போலீசாரையும், துணை ராணுவப் படையினரையும் களமிறக்கி மத்திய அரசு அடக்குமுறையைக் கையாளுவதாக அவர் குற்றம் சாட்டியுள்ளார். மேலும், போராட்டப் பகுதிகளில் இணையதள இணைப்பைத் துண்டிப்பது மற்றும் மெட்ரோ ரயில் நிலையங்களை மூடுவது போன்ற தேவையற்ற நடவடிக்கைகள் மூலம் மாணவர்களின் குரலை ஒடுக்க மத்திய அரசு முயல்வதாகவும் அவர் சாடியுள்ளார்.

இதுதொடர்பாக தனது எக்ஸ் சமூக வலைத்தளப் பக்கத்தில் கேள்வி எழுப்பியுள்ள பெ. சண்முகம், நீட் தேர்வில் நடந்த குளறுபடிகளுக்கும், அதன் காரணமாக லட்சக்கணக்கான மாணவர்கள் எதிர்கொண்டுள்ள வேதனைகளுக்கும் பொறுப்பான மத்திய கல்வி அமைச்சர் தர்மேந்திர பிரதானை ஏன் இன்னும் பதவியில் நீடிக்க விட்டுள்ளனர் என்று கேட்டுள்ளார். “தர்மேந்திர பிரதான் என்ற ஒரு அமைச்சரைப் பதவியில் இருந்து நீக்குவதால் மத்திய அரசு கவிழ்ந்துவிடுமா?” என்று பிரதமர் நரேந்திர மோடியை நோக்கி அவர் காரசாரமான கேள்வியையும் எழுப்பியுள்ளார்.

“உப்பைத் தின்றவன் தண்ணீர் குடித்தே தீர வேண்டும்” என்ற பழமொழியைச் சுட்டிக்காட்டிய அவர், கல்வித் துறையில் இவ்வளவு பெரிய முறைகேடுகள் நடப்பதற்குக் காரணமானவர்கள் யாராக இருந்தாலும் அவர்கள் மீது உரிய கடுமையான நடவடிக்கைகள் எடுக்கப்பட வேண்டும் என்று வலியுறுத்தியுள்ளார். மாணவர்களின் நீண்ட நாள் மன உளைச்சலுக்கும், அவர்களின் தொடர் போராட்டங்களுக்கும் உடனடியாக முற்றுப்புள்ளி வைக்க வேண்டும் என்றால், பிரதமர் மோடி உடனடியாக தலையிட்டு மத்திய அமைச்சர் தர்மேந்திர பிரதானை பதவியில் இருந்து நீக்க வேண்டும் என்று பெ. சண்முகம் தனது அறிக்கையில் மத்திய அரசுக்கு கோரிக்கை விடுத்துள்ளார்.