“ஐயோ கடவுளே.. மரண வீட்டில் நள்ளிரவு 1 மணிக்கு அரங்கேறிய பயங்கரம்..” துக்கத்தில் அமர்ந்திருந்த 5 பேர் மீது 90 கி.மீ வேகத்தில் பாய்ந்த மரண கார்.. நெஞ்சை உலுக்கும் சம்பவம்..!!

உத்தரக்கண்ட மாநிலம் நைனிடால் மாவட்டத்தின் ராம்நகரில், நேற்று நள்ளிரவு சுமார் 1 மணி அளவில் அதிவேகமாக வந்த கார் ஒன்று அடுத்தடுத்து நிகழ்த்திய கோர விபத்து அப்பகுதியில் பெரும் பரபரப்பையும் பீதியையும் ஏற்படுத்தியுள்ளது. நண்பரின் ஸ்விஃப்ட் டிசையர் காரை ஓட்டி வந்த ஒரு இளைஞர், ராம்நகர்-ராணிகேட் சாலையில் முதலில் ஒரு இருசக்கர வாகனத்தின் மீது பலமாக மோதியுள்ளார். இந்த விபத்தில் பைக்குகளில் சென்றவர்கள் படுகாயமடைந்த நிலையில், விபத்தை ஏற்படுத்திய ஓட்டுநர் காரை நிறுத்தாமல் டெலிபுரா பகுதியை நோக்கி அதிவேகமாகத் தப்பியோடியுள்ளார்.

அங்குள்ள ஒரு வீட்டில் முதியவர் ஒருவர் காலமானதால், அவரது மகன்கள் உள்ளிட்ட உறவினர்கள் வீட்டின் வெளியே அமர்ந்து நள்ளிரவில் துக்கம் அனுசரித்துக் கொண்டிருந்தனர். அப்போது கட்டுப்பாட்டை இழந்த அந்த கார், சுமார் 80 முதல் 90 கி.மீ வேகத்தில் வந்து துக்கத்தில் அமர்ந்திருந்த ஐந்து சகோதரர்கள் மீதும் மிகக் கொடூரமாக ஏறியது. இந்த விபத்தில் அங்கு நிறுத்தப்பட்டிருந்த மூன்று பைக்குகளும், மற்றொரு காரும் பலத்த சேதமடைந்தன. பாதிக்கப்பட்ட ஐந்து சகோதரர்களில் மூவர் ராம்நகர் மற்றும் காஷிபூர் மருத்துவமனைகளில் அனுமதிக்கப்பட்டுள்ள நிலையில், நிலைமை கவலைக்கிடமாக இருந்த ஒருவர் உயர்தர சிகிச்சைக்காக அவசரமாகப் பரிந்துரைக்கப்பட்டுள்ளார்.

விபத்து நடந்த உடனேயே அங்கிருந்த பொதுமக்கள், காரை ஓட்டி வந்த நபரை மடக்கிப் பிடித்து காவல்துறையிடம் ஒப்படைத்தனர். விபத்தை ஏற்படுத்திய ஓட்டுநரைத் தன் வசம் எடுத்துள்ள போலீசார், அவர் விபத்தின் போது மது போதையில் இருந்தாரா மற்றும் எவ்வளவு வேகத்தில் காரை ஓட்டினார் என்பது குறித்து தீவிர விசாரணை நடத்தி வருகின்றனர். ஒரே காரால் அடுத்தடுத்து நிகழ்ந்த இந்த இரண்டு விபத்துகள் அந்தப் பகுதி மக்களிடையே பெரும் அதிர்ச்சியை ஏற்படுத்தியுள்ளது.