“அவரை சும்மா விடமாட்டேன்…” பெண்ணிற்கு உணவில் கலக்கப்பட்ட ஸ்லோ பாய்சன்.. ரகசிய கேமராவில் சிக்கிய கார்ப்பரேட் இன்ஜினியரின் கொடூர முகம்.. திடுக்கிடும் பின்னணி..!!

அமெரிக்காவின் கலிபோர்னியாவில், உடன் பணிபுரிந்த பெண் பொறியாளரை 18 மாதங்களாக உணவிலும் நீரிலும் மெல்ல மெல்ல நச்சுத்தன்மை கொண்ட வேதிப்பொருளைக் கலந்து கொடுத்துக் கொல்ல முயன்ற வழக்கில் தண்டனை பெற்ற நபர், தற்போது தன் மீதான குற்றப் பதிவைச் சட்டப்பூர்வமாக நீக்கக் கோரி நீதிமன்றத்தை நாடியுள்ளார். ‘பெர்க்லி இன்ஜினியரிங் அண்ட் ரிசர்ச்’ நிறுவனத்தில் இரசாயனப் பொறியாளராகப் பணிபுரிந்த டேவிட் சூ என்பவர், ராங் யுவான் என்ற பெண் ஊழியரின் உணவிலும் குடிநீரிலும் ‘காட்மியம்’ என்ற அபாயகரமான நச்சு உலோகத்தை ரகசியமாகக் கலந்து வந்துள்ளார். இதனால் யுவான் கடுமையான உடல்நலக் குறைபாடுகளுக்கு உள்ளாகி, பலமுறை மரணத்தின் விளிம்பு வரை சென்று மீண்டுள்ளார். தன் மீதான சந்தேகத்தால் யுவான் தனது மேஜையில் ரகசிய கேமராவைப் பொருத்தியபோது, டேவிட் சூ நஞ்சு கலக்கும் அதிர்ச்சியூட்டும் காட்சிகள் அம்பலமாகின. இதனைத் தொடர்ந்து 2019-ல் கைது செய்யப்பட்ட டேவிட் சூ, நீதிமன்றத்தில் தன் குற்றத்தை ஒப்புக்கொண்டதைத் தொடர்ந்து அவருக்கு இரண்டு ஆண்டுகள் நன்னடத்தை (Probation) தண்டனை விதிக்கப்பட்டது.

இந்நிலையில், தனக்கு அளிக்கப்பட்ட நன்னடத்தை காலம் 2026-ல் நிறைவடைந்துவிட்டதாகக் கூறி, தனது குற்றப் பின்னணிப் பதிவை முழுமையாக ரத்து செய்யக் கோரி டேவிட் சூ நீதிமன்றத்தில் மனுத் தாக்கல் செய்துள்ளார். இந்தத் தகவல், மிகக் கொடூரமான கொலை முயற்சியில் இருந்து மயிரிலையில் உயிர் பிழைத்த ராங் யுவானுக்குப் பெருத்த ஏமாற்றத்தையும் ஆத்திரத்தையும் ஏற்படுத்தியுள்ளது. இந்த விவகாரம் குறித்துப் பேசியுள்ள யுவான், தான் அனுபவித்த கொடுமைகளுக்கும் வேதனைகளுக்கும் அந்த நபர் தகுந்த விலையைக் கொடுத்தே ஆக வேண்டும் என்றும், சட்டத்தின் பிடியில் இருந்து அவர் அவ்வளவு எளிதாகத் தப்பிப்பதை தான் ஒருபோதும் அனுமதிக்கப் போவதில்லை என்றும் உறுதியுடன் தெரிவித்துள்ளார். இந்தச் சட்டப் போராட்டம் அமெரிக்கப் பொறியாளர்கள் மற்றும் பன்னாட்டு நிறுவனங்கள் மத்தியில் தற்போது பெரும் பரபரப்பை ஏற்படுத்தியுள்ளது.