திடுக்கிடும் திருப்பம்..! கல்லூரிக்குச் சென்ற பெண்… 2 நாட்களுக்குப் பின் குளியலறையில் சடலம்..! வாரணாசியை உலுக்கிய மர்மக் கொலையின் பின்னணி..!!

வாரணாசியின் ரோஹனியா காவல் எல்லைக்குட்பட்ட மருய் பகுதியைச் சேர்ந்த 21 வயதான ஸ்ரேயா உபாத்யாயா, ஜகத்கஞ்ச் முதுகலை கல்லூரியில் வேதியியல் துறையில் எம்.எஸ்சி படித்து வந்தார். கடந்த ஆகஸ்ட் 18 அன்று வழக்கம்போல கல்லூரிக்குச் சென்ற அவர் மீண்டும் வீடு திரும்பவில்லை. இதனால் பதற்றமடைந்த குடும்பத்தினர் கல்லூரிக்குச் சென்று விசாரித்தபோது, ஸ்ரேயா அன்று கல்லூரிக்கு வரவில்லை என்பது தெரியவந்தது. இதையடுத்து, குடும்பத்தினர் ஜக்கினி காவல் சௌக்கியில் புகார் அளித்ததைத் தொடர்ந்து காவல்துறை காணாமல் போன வழக்காகப் பதிவு செய்து தீவிர விசாரணை மேற்கொண்டு வந்தது.

காவல்துறையினர் ஸ்ரேயாவின் செல்போன் இருப்பிடத்தை வைத்து ஆய்வு செய்ததில், பச்சாவ் பகுதியில் உள்ள ஒரு வாடகை வீட்டில் அவரது உடல் கண்டெடுக்கப்பட்டது. அந்த வீட்டின் குளியலறையில் ஸ்ரேயாவின் சடலம் மறைத்து வைக்கப்பட்டிருந்தது. அவரது கழுத்து கூர்மையான ஆயுதத்தால் அறுக்கப்பட்டிருந்ததோடும், மண்டையோட்டில் கனமான பொருளால் தாக்கப்பட்ட காயங்களும் இருந்தன. உடலைக் கைப்பற்றிய போலீசார் பிரேதப் பரிசோதனைக்கு அனுப்பி வைத்தனர். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.

இந்தக் கொடூரக் கொலையைச் செய்தது குடும்பத்தின் தூரத்து உறவினரான விவேக் சௌபேதான் என்று ஸ்ரேயாவின் குடும்பத்தினர் குற்றம் சாட்டியுள்ளனர். அந்த வாடகை வீட்டை விவேக் சௌபேதான் வாடகைக்கு எடுத்திருந்தார் என்றும், கொலைக்குப் பிறகு அவர் தலைமறைவாகிவிட்டதாகவும் கூறப்படுகிறது. ஸ்ரேயாவின் தந்தையார் அவரது திருமணத்தை வேறு ஒரு வாலிபருடன் நிச்சயம் செய்திருந்த நிலையில், காதல் விவகாரம் ஏதேனும் பின்னணியில் உள்ளதா என்ற கோணத்திலும் போலீசார் விசாரித்து வருகின்றனர். தலைமறைவாக உள்ள விவேக் சௌபேவை பிடிக்க டிசிபி நீது காத்யான் தலைமையில் 4 சிறப்புப் படைகள் அமைக்கப்பட்டு தீவிரத் தேடுதல் வேட்டை நடைபெற்று வருகிறது.