“இது என்ன கொடுமை..” வேலை கிடைத்த அதே நாளில் நேர்ந்த கொடூரம்.. காற்றில் தூக்கி வீசப்பட்ட 19 வயது மாணவனுக்கு நேர்ந்த விபரீதம்.. நெஞ்சை உலுக்கும் சம்பவம்..!!

கர்நாடக மாநிலம் நஞ்சன்கூடு பகுதியில் உள்ள ஜே.எஸ்.எஸ் பாலிடெக்னிக் கல்லூரிக்கு வெளியே, நேற்று அதிவேகமாக வந்த கார் மோதிய விபத்தில் பிரிதேஷ் ஜெயின் (19) என்ற மாணவர் பரிதாபமாக உயிரிழந்தார். பாலிடெக்னிக் படிப்பை முடித்து, சமீபத்தில் நடந்த நேர்காணலில் தேர்வாகி வேலை பெற்றிருந்த பிரிதேஷ், தனது பணி நியமனக் கடிதத்தை வாங்குவதற்காக நேற்று கல்லூரிக்குத் திரும்பியபோது இந்தத் துயரம் நிகழ்ந்துள்ளது. அவர் சாலையைக் கடக்க முயன்றபோது பெங்களூரு பதிவு எண் கொண்ட ஒரு கார் மிக அதிவேகமாக வந்து அவர் மீது மோதியது. இந்த மோதலின் தாக்கத்தில் அவர் காற்றில் தூக்கி வீசப்பட்டு, சம்பவ இடத்திலேயே கடுமையான காயங்களுடன் உயிரிழந்தார். இந்த நெஞ்சைப் பிசையும் விபத்துக் காட்சி அங்கிருந்த சிசிடிவி கேமராவில் பதிவாகி பெரும் அதிர்ச்சியை ஏற்படுத்தியுள்ளது.

இந்த விபத்தை ஏற்படுத்திய காரின் ஓட்டுநர் வாகனத்தை அங்கேயே விட்டுவிட்டுத் தப்பியோடிவிட்ட நிலையில், நஞ்சன்கூடு போக்குவரத்துப் போலீசார் காரைப் பறிமுதல் செய்து ஓட்டுநரைத் தீவிரமாகத் தேடி வருகின்றனர். இச்சம்பவத்தால் ஆத்திரமடைந்த ஜே.எஸ்.எஸ் பாலிடெக்னிக் கல்லூரி மாணவர்கள், தேசிய நெடுஞ்சாலை ஆணைக்குழுவுக்கு எதிராக முழக்கங்களை எழுப்பி சாலை மறியல் போராட்டத்தில் ஈடுபட்டனர். கல்லூரிக்கு வெளியே மாணவர்கள் பாதுகாப்பாகச் சாலையைக் கடக்க ஏதுவாக வேகத்தடைகள், எச்சரிக்கைப் பலகைகள் போன்ற போக்குவரத்துப் பாதுகாப்பு உள்கட்டமைப்புகளை உடனடியாக நிறுவ வேண்டும் என்றும், உயிரிழந்த மாணவரின் குடும்பத்திற்குத் தகுந்த இழப்பீடு வழங்க வேண்டும் என்றும் அவர்கள் கோரிக்கை விடுத்துள்ளனர்.