“ஐயோ பாவம்… வாட்டர் பாட்டிலைத் தொலைத்த சிறுமிக்கு விசித்திர தண்டனை… பிளாஸ்டிக் கவரில் தண்ணீர் கொடுத்து பாடம் புகட்டிய தாய்…!!”

பள்ளி செல்லும் சிறு குழந்தைகள் தங்களது தண்ணீர் பாட்டிலை தொலைத்து விடுவது அல்லது நண்பர்களிடம் கொடுத்துவிட்டு வருவது வழக்கமாக நடக்கும் ஒரு விஷயமாகும். பெற்றோர் எவ்வளவு எடுத்துச் சொன்னாலும் குழந்தைகள் இந்தத் தவறைத் திரும்பத் திரும்பச் செய்வதுண்டு. அப்படித் தன் தண்ணீர் பாட்டிலைத் தொலைத்த அல்லது நண்பருக்குக் கொடுத்த ஒரு சிறுமிக்கு, அவளது தாய் விசித்திரமான முறையில் பாடம் கற்பித்த மனதைத் தொடும் வீடியோ ஒன்று சமூக வலைதளங்களில் வைரலாகி வருகிறது. இன்ஸ்டாகிராமில் mixed_by_blood என்ற கணக்கில் பகிரப்பட்ட இந்த வீடியோவை இதுவரை 60 லட்சத்திற்கும் அதிகமானோர் பார்த்துள்ளனர்.

வீடியோவில், பள்ளிச் சீருடை அணிந்து முதுகில் பையுடன் பள்ளிக்குக் கிளம்பும் ஒரு சிறுமி நிற்கிறாள். அப்போது அவளது தாய், தண்ணீர் பாட்டிலுக்குப் பதிலாக ஒரு பிளாஸ்டிக் கவரில் தண்ணீரைக் ஊற்றி அவளிடம் கொடுக்கிறார். தன் பொருட்களைப் பத்திரமாக வைத்திருக்க வேண்டும் என்பதற்காக தாய் கொடுத்த இந்த தண்டனையைக் கண்டு அந்தச் சிறுமி மிகவும் அதிர்ச்சியடைகிறாள். ஆரம்பத்தில் அந்த பிளாஸ்டிக் பையை வாங்க மறுத்து, அவமானத்துடனும் வருத்தத்துடனும் முகத்தைச் சுளிக்கும் அந்தச் சிறுமி, தாயின் வற்புறுத்தலால் வேறு வழியின்றி சோகத்துடன் அதை வாங்கிச் செல்கிறாள்.

https://www.instagram.com/reel/Da1rHtBzMIg/?utm_source=ig_web_button_share_sheet

வீட்டை விட்டு வெளியேறி பள்ளிக்குச் செல்லும்போது, அந்தச் சிறுமி தன் வருத்தத்தைத் தாங்க முடியாமல் கண்ணீர் விட்டு அழத் தொடங்குகிறாள். இந்த வீடியோ சமூக வலைதள பயனர்களிடையே கலவையான விமர்சனங்களைப் பெற்றுள்ளது. சில பயனர்கள், குழந்தைகள் பொறுப்புடன் நடக்கக் கற்றுக்கொடுக்க இது நல்ல வழி என்று ஆதரித்தாலும், வேறு சிலர் இவ்வளவு சிறிய குழந்தைகளிடம் சற்று மென்மையாக நடந்துகொள்ள வேண்டும் என்றும், அவளது பிஞ்சு மனதின் சோகத்தைப் பார்த்துத் தாங்கள் உருகிவிட்டதாகவும் கருத்து தெரிவித்து வருகின்றனர்.