மேஜைக்கு அடியில் என்ன?பள்ளிக்குள் புகுந்த 5 அடி நாகப்பாம்பு… அலறியடித்து ஓடிய மாணவர்கள் – நெஞ்சை பதறவைக்கும் பரபரப்பு வீடியோ…!

ராஜஸ்தான் மாநிலம் பாலி மாவட்டத்தில் உள்ள கோட்ரா பகுதியில் இயங்கி வரும் ஒரு அரசுப் பள்ளியில் பெரும் பரபரப்பு ஏற்பட்டது. வழக்கம் போல ஆசிரியர் பாடம் நடத்திக் கொண்டிருந்த போது, திடீரென சுமார் 5 அடி நீளமுள்ள கொடிய விஷமுடைய நாகப்பாம்பு ஒன்று வகுப்பறைக்குள் நுழைந்தது. சற்றும் எதிர்பாராத இந்த சம்பவத்தைக் கண்ட மாணவர்கள் மிகுந்த அச்சமடைந்து, அலறியடித்தபடி வகுப்பறையை விட்டு முண்டியடித்துக் கொண்டு வெளியேறினர். உடனடியாக சுதாரித்துக் கொண்ட ஆசிரியர்கள், மாணவர்களைப் பாதுகாப்பான வேறு இடத்திற்கு அழைத்துச் சென்றனர்.

நிலைமையைக் கட்டுக்குள் கொண்டுவர, வனவிலங்கு மீட்பாளரான சுரேந்திர சிங் என்பவருக்கு அவசரத் தகவல் கொடுக்கப்பட்டது. பள்ளிக்கு விரைந்து வந்த அவர் உடனடியாக மீட்புப் பணிகளில் ஈடுபட்டார். அந்த நாகப்பாம்பு, வகுப்பறையில் மாணவர்கள் அமரும் இரும்பு நாற்காலி ஒன்றில் மிகவும் இறுக்கமாகச் சுற்றிக் கொண்டிருந்ததால் அதனைப் பிடிப்பதில் ஆரம்பத்தில் சற்று சிரமம் ஏற்பட்டது. இருப்பினும், மிகவும் லாவகமாகச் செயல்பட்ட சுரேந்திர சிங், பாம்பிற்கும் சரி அங்கிருந்தவர்களுக்கும் சரி எந்தவிதத் தீங்கும் நேராத வண்ணம் சாதுர்யமாகச் செயல்பட்டு அந்தப் பாம்பைப் பிடித்தார்.

பிடிபட்ட அந்தப் பெரிய நாகப்பாம்பை மிகவும் பாதுகாப்பான முறையில் ஒரு பையில் அடைத்த மீட்பாளர், பின்னர் அதனை மக்கள் நடமாட்டம் இல்லாத அருகிலுள்ள வனப்பகுதியில் பத்திரமாக விடுவித்தார். வகுப்பறைக்குள் புகுந்த பாம்பால் அதுவரை மிகுந்த அச்சத்திலும் பதற்றத்திலும் உறைந்திருந்த பள்ளி மாணவர்களும், ஆசிரியர்களும் பாம்பு பாதுகாப்பாகப் பிடிபட்ட பின்னரே நிம்மதிப் பெருமூச்சு விட்டனர். சரியான நேரத்தில் செயல்பட்டு பாம்பை மீட்ட மீட்பாளருக்கு அனைவரும் தங்களது நன்றிகளைத் தெரிவித்துக் கொண்டனர்.