“சட்டப்பிரிவு 167-ஐ கையில் எடுக்கும் ராஜ் பவன்.. முதல்வர் விஜய்க்கு வரப்போகும் செக்.. மிரளும் அறிவாலயம்.. தமிழக அரசியலில் திடீர் பூகம்பம்”..!!

தமிழக வெற்றிக் கழகத்தின் அண்மைக்கால அரசியல் நகர்வுகள் மற்றும் தேர்தல் களப் பின்னணியில் “குதிரை பேரம்” தொடர்பான விவாதங்கள் அரசியல் வட்டாரத்தில் பரவலாகப் பேசப்பட்டு வருகின்றன. இந்நிலையில் தவெக அரசுக்கு எதிராக எதிர்க்கட்சிகள் முன்வைத்துள்ள ‘குதிரை பேரம்’ மற்றும் எம்எல்ஏ-க்கள் கட்சித் தாவல் புகார்கள் தொடர்பாக, தமிழக ஆளுநர் ராஜேந்திர விஸ்வநாத் அர்லேகர் விரைவில் விளக்கம் கேட்க உள்ளதாக வெளியாகியுள்ள தகவல்கள் அரசியல் வட்டாரத்தில் பெரும் பரபரப்பை ஏற்படுத்தியுள்ளன. சி.விஜயபாஸ்கர், எம்.ஆர்.விஜயபாஸ்கர் உட்பட அதிமுகவைச் சேர்ந்த ஆறு சட்டமன்ற உறுப்பினர்கள் அடுத்தடுத்து தங்களது பதவிகளை ராஜினாமா செய்துவிட்டு தவெக-வில் இணைந்தது மிகப்பெரிய விவாதத்தைக் கிளப்பியது. இது ஆளுங்கட்சியின் அதிகார துஷ்பிரயோகம் மற்றும் திட்டமிட்ட ஜனநாயகப் படுகொலை என்று குற்றம் சாட்டி அதிமுக கொறடா அக்ரி எஸ்.எஸ்.கிருஷ்ணமூர்த்தி, திமுகவின் ஆர்.எஸ்.பாரதி தலைமையிலான குழு மற்றும் பாஜக மாநிலத் தலைவர் நயினார் நாகேந்திரன் ஆகியோர் தனித்தனியாக ஆளுநரைச் சந்தித்துப் புகார் மனுக்களை அளித்துள்ளனர்.

எதிர்க்கட்சிகளின் இந்தத் தொடர் புகார்களைத் தொடர்ந்து, ஆளுநர் அர்லேகர் அண்மையில் டெல்லிக்கு அவசரப் பயணம் மேற்கொண்டு மத்திய உள்துறை அமைச்சக அதிகாரிகள் மற்றும் சட்ட வல்லுநர்களுடன் தீவிர ஆலோசனையில் ஈடுபட்டதாகத் தெரிகிறது. டெல்லியிலிருந்து சென்னை திரும்பியுள்ள ஆளுநர், இந்த விவகாரத்தில் அடுத்தகட்ட சட்டப்பூர்வ நடவடிக்கைகளை எடுக்கத் தயாராகி வருவதாகத் தலைமைச் செயலக வட்டாரங்கள் தெரிவிக்கின்றன. குறிப்பாக, இந்திய அரசியலமைப்புச் சட்டத்தின் 167-வது பிரிவைப் பயன்படுத்தி, மாநில நிர்வாகம் மற்றும் எதிர்க்கட்சிகளின் குற்றச்சாட்டுகள் குறித்து விரிவான விளக்கம் அளிக்குமாறு முதலமைச்சர் விஜய்க்கு ராஜ் பவன் தரப்பிலிருந்து முறைப்படி கடிதம் அனுப்பப்பட வாய்ப்புள்ளதாகக் கூறப்படுகிறது.

ஆளுநர் அனுப்பவுள்ள இந்தக் கடிதத்தில், அதிமுக எம்எல்ஏ-க்கள் திடீரென ராஜினாமா செய்ததன் பின்னணி என்ன, அவர்களுக்கு ஏதேனும் நிதிப் பரிமாற்றங்கள் அல்லது பதவிகள் ஆசை காட்டப்பட்டதா என்பது போன்ற அடுக்கடுக்கான கேள்விகள் எழுப்பப்படலாம் என்று எதிர்பார்க்கப்படுகிறது. இருப்பினும், ஆளுநர் விளக்கம் கேட்பது மட்டுமே உடனடியாக அரசுக்கு எதிரான நேரடி நடவடிக்கையாக மாறிவிடாது என்றும், முதல்வர் விஜய் அளிக்கும் பதில்கள், எதிர்க்கட்சிகள் சமர்ப்பிக்கும் ஆதாரங்கள் ஆகியவற்றைப் பொறுத்தே ஆளுநரின் அடுத்தகட்ட நகர்வுகள் அமையும் என்றும் அரசியல் நோக்கர்கள் கருதுகின்றனர். டெல்லியின் ஆதரவுடன் ஆளுநர் மாளிகை காட்டும் இந்தத் தீவிரம், தவெக அரசுக்கும் ஆளுநருக்கும் இடையே ஒரு புதிய அதிகார மோதலுக்கு வழிவகுக்குமா அல்லது இந்தச் சவாலை விஜய் அரசு அரசியல் ரீதியாக முறியடிக்குமா என்ற எதிர்பார்ப்பு தமிழகத்தில் அதிகரித்துள்ளது.