இவர்தான்பா நிஜ ஹீரோ..! மழையாவது… வெள்ளமாவது…! மணமகளை கைகளில் தூக்கி மாஸ் காட்டிய மணமகன்..! வைரல் வீடியோ..!!

மத்தியப் பிரதேச மாநிலம் இந்தூரில் பெய்த கனமழையால் திருமண மண்டபம் முழுவதும் தண்ணீரால் சூழ்ந்த நிலையிலும், மணமகன் தனது மணமகளைக் கைகளில் தூக்கிக்கொண்டு சென்று திருமணம் செய்த சுவாரசியமான வீடியோ சமூக வலைதளங்களில் வைரலாகி வருகிறது. டெல்லியைச் சேர்ந்த இந்த ஜோடி, தங்களது திருமணத்திற்காக இந்தூரில் உள்ள ஒரு அழகான மேரேஜ் கார்டனைத் தேர்ந்தெடுத்திருந்தனர். ஆனால், அங்கு பெய்த சாதனை அளவிலான கனமழையால், அந்த மண்டபம் முழுவதும் ஒரு குளம் போல காட்சியளிக்கும் அளவுக்குத் தண்ணீர் தேங்கியது.

மண்டபத்தைச் சுற்றி சுமார் இரண்டு அடி வரை தண்ணீர் தேங்கியிருந்ததால், திருமணத்திற்கு வந்திருந்த உறவினர்கள் பெரும் சிரமத்துடன் அங்கு வந்து சேர்ந்தனர். குறிப்பாக, மணமகள் அணிந்திருந்த கனமான லெஹங்கா ஆடையுடன் அந்தச் சேறும் சகதியுமான தண்ணீரில் நடந்து செல்வது முற்றிலும் சாத்தியமில்லாத ஒன்றாக இருந்தது. இதைக் கண்ட மணமகன், சினிமா ஹீரோ பாணியில் உடனடியாகத் தனது மணமகளைத் தன் கைகளில் தூக்கிக்கொண்டு, புன்னகையுடன் தண்ணீரைத் தாண்டி திருமண மேடைக்கு அழைத்துச் சென்றார்.

பொதுவாக இதுபோன்ற இக்கட்டான சூழ்நிலைகளில் மக்கள் திருமணத்தை ஒத்திவைக்கவோ அல்லது இடத்தை மாற்றவோ நினைப்பார்கள். ஆனால், இந்த ஜோடி முழங்கால் அளவு தண்ணீருக்கும் கொட்டும் மழைக்கும் மத்தியிலேயே தங்களது ஏழு சுற்றுகள் எடுக்கும் புனிதமான திருமணச் சடங்குகளை மகிழ்ச்சியுடன் நடத்தி முடித்தனர். மணமகனின் இந்த அன்பான, அக்கறையான செயலையும், இந்த ஜோடியின் அர்ப்பணிப்பையும் பாராட்டி சமூக வலைதளப் பக்கங்களில் நெட்டிசன்கள் பலரும் தங்களது வாழ்த்துகளைத் தெரிவித்து வருகின்றனர்.