“டேய் தம்பி… கீழ இறங்கி வா…! தெருவிளக்குக் கம்பத்தின் உச்சியில் ‘புல்-அப்ஸ்’ எடுத்த இளைஞன்… சமூக வலைதளங்களில் விவாதத்தைக் கிளப்பிய வைரல் வீடியோ…!!”

கொல்கத்தாவில் மிகவும் உயரமான தெருவிளக்குக் கம்பத்தின் உச்சிக்கு ஏறிய இளைஞர் ஒருவர், எவ்வித பாதுகாப்பு உபகரணங்களும் இன்றி ஆபத்தான முறையில் புல்-அப்ஸ் மற்றும் உடல் எடைப் பயிற்சிகளை மேற்கொண்ட காணொளி சமூக வலைதளங்களில் வேகமாகப் பரவி வருகிறது. எந்தவித பயமுமின்றி அவர் கச்சிதமான சமநிலையுடன் சாகசம் செய்ததை கீழே இருந்த மக்கள் தங்களது கேமராவில் பதிவு செய்துள்ளனர். அதேவேளையில், சம்பவ இடத்தில் தீயணைப்பு வாகனம் நிறுத்தப்பட்டிருந்த நிலையில், இந்தச் சாகசம் அனுமதியுடன் செய்யப்பட்டதா அல்லது அவசர அழைப்பைப் ஏற்று தீயணைப்பு வீரர்கள் வந்தனரா என்பது இன்னும் தெளிவாகத் தெரியவில்லை.

இந்தக் காணொளியைப் பார்த்த இணையவாசிகளில் பலர் அவரை அதிரடித் திரைப்பட நாயகனுடன் ஒப்பிட்டும், உடற்பயிற்சிக் கூடங்களுக்கு மாற்று வழியைக் கண்டுபிடித்துவிட்டார் என வேடிக்கையான மீம்கள் மற்றும் நகைச்சுவையான கருத்துகள் மூலமாகவும் தங்களது எதிர்வினைகளைப் பதிவிட்டுள்ளனர். அதேசமயம், கம்பத்தின் உச்சியில் அந்த இளைஞன் அச்சமின்றி இருந்தபோதிலும், அதைப் பார்த்த தங்களுக்குக் கைகால்கள் நடுங்கியதாகச் சிலர் தங்களின் பதற்றத்தைப் பகிர்ந்து கொண்டனர்.

இருப்பினும், பெரும்பாலான மக்கள் இந்தச் செயலை மிகக் கடுமையாக விமர்சித்துள்ளனர். எவ்வித பாதுகாப்பு வழிகாட்டல்களும் இல்லாமல் இவ்வளவு அபாயகரமான உயரத்தில் சாகசம் செய்வது உயிருக்கே ஆபத்தாக முடியும் என்றும், ஒரு கணம் நிலைதடுமாறினாலும் அது பேரழிவில் முடிந்திருக்கும் என்றும் கூறி, இதுபோன்ற ஆபத்தான முயற்சிகளை வேடிக்கையாகக் கருதக் கூடாது என எச்சரித்துள்ளனர்.