“ராஜினாமா பண்ண அடுத்த நிமிஷமே எப்படி..?” அதிமுக எம்.எல்.ஏ-க்கள் கட்சி தாவல் விவகாரத்தில் கொந்தளித்த எடப்பாடி.. சவால் விட்ட அமைச்சர் செங்கோட்டையன்… சட்டப்பேரவையில் பரபரப்பு..!!

தமிழக சட்டப்பேரவையில் எதிர்க்கட்சித் தலைவர் எடப்பாடி பழனிசாமி மற்றும் தவெக அமைச்சர் செங்கோட்டையன் ஆகியோருக்கு இடையே குதிரை பேரம் தொடர்பாகக் கடுமையான வாக்குவாதமும் விவாதமும் அரங்கேறியுள்ளது. அதிமுக சார்பில் வெற்றி பெற்றவர்கள், சபாநாயகரைச் சந்தித்துத் தங்களது ராஜினாமா கடிதத்தைக் கொடுத்த சில நிமிடங்களிலேயே வேறு கட்சியில் இணைவது எப்படிச் சாத்தியம் என்று எடப்பாடி பழனிசாமி அவையில் காரசாரமான கேள்வியை எழுப்பினார்.

இதற்குப் பதிலடி கொடுத்துப் பேசிய தவெக அமைச்சர் செங்கோட்டையன், எடப்பாடி தொகுதியில் தவெக வேட்பாளர் வாபஸ் பெற்றது குதிரை பேரம் இல்லையா என்று எதிர் கேள்வி எழுப்பினார். மேலும், அந்த வேட்பாளரை உடனடியாக அதிமுகவில் சேர்த்துக் கொண்டது மட்டும் குதிரை பேரம் ஆகாதா என்று அவர் எடப்பாடி பழனிசாமியை நோக்கிப் பேரவையில் மிகக் காட்டமாகச் சாடினார்.

அமைச்சரின் இந்தக் குற்றச்சாட்டை முற்றிலுமாக நிராகரித்த எடப்பாடி பழனிசாமி, தவெக வேட்பாளர் முறையாக வேட்புமனுத் தாக்கல் செய்யாத காரணத்தினாலேயே அவரது மனு தள்ளுபடி செய்யப்பட்டது என்று விளக்கமளித்தார். அத்துடன், வேட்புமனு தாக்கல் செய்யப்பட்ட போதே தவெக வேட்பாளரைத் தான் ஒரு பொருட்டாகவே எடுத்துக்கொள்ளவில்லை என்று அவர் அவையில் மிக அதிரடியாகப் பேசிப் பதிலடி கொடுத்துள்ளார்.