நாட்டையே உலுக்கிய கொடூரம்..! 6-வது மாடியில் இருந்து 2 வயது குழந்தை தள்ளப்பட்ட விவகாரம்.. சிசிடிவி ஆதாரங்களை அழிக்க முயன்ற தாயும் 12 வயது சிறுமியும் அதிரடி கைது..!!

மும்பை கோரேகான் பகுதியில் கடந்த அக்டோபர் 14, 2026 அன்று, குடியிருப்பு கட்டடத்தின் 6-வது மாடியில் இருந்து திறந்த டக்டில் தள்ளப்பட்டதன் காரணமாக 2 வயது சிறுமி பரிதாபமாக உயிரிழந்தார். இந்தச் சம்பவத்தில் 12 வயது சிறுமி ஒருவருக்குத் தொடர்பு இருப்பது விசாரணையில் தெரியவந்துள்ளது. சிறுமி கைப்பேசியில் விளையாடியபடியும், படுகொலைக்குப் பின் தனது சைக்கிளில் வழக்கம் போல் வலம் வந்ததும் சிசிடிவி கேமரா காட்சிகளின் மூலம் அம்பலமாகியுள்ளது.

இந்தக் கோரச் சம்பவத்தை மறைப்பதற்காக அந்த 12 வயது சிறுமியின் தாய், சங்க அலுவலகத்திற்குச் சென்று அங்கிருந்த முக்கியமான சிசிடிவி பதிவுகளை அதிரடியாக நீக்கியுள்ளார். இருப்பினும், சைபர் க்ரைம் வல்லுநர்களின் உதவியுடன் அந்த அழிக்கப்பட்ட காணொளிகள் மீட்கப்பட்டு உண்மைகள் வெளிச்சத்திற்கு வந்தன. குற்றத்தை மறைக்க முயன்ற தாய் மற்றும் விசாரணையின் கீழ் உள்ள சிறுமி ஆகிய இருவரையும் மும்பை காவல் துறையினர் அதிரடியாகக் கைது செய்து விசாரணை நடத்தி வருகின்றனர்.

இந்தச் சம்பவம் குறித்து இயற்கைக்கு மாறான மரணம் என வழக்குப்பதிவு செய்யப்பட்டுள்ளது. 2 வயதுக் குழந்தை உயிரிழந்ததற்கான உண்மையான காரணம் மற்றும் தடயங்களை அழிக்க முயன்றது தொடர்பான கோணங்களில் மும்பை காவல்துறையினர் தீவிர விசாரணை மேற்கொண்டு வருகின்றனர். சிறுமி ஒருவர் மீதான இந்தக் குற்றச்சாட்டும், தாயின் துணையோடு ஆதாரங்களை அழிக்க முயன்ற விவகாரமும் மும்பை மக்களிடையே பெரும் அதிர்ச்சியையும் சோகத்தையும் ஏற்படுத்தியுள்ளது.