11 நாட்களாகத் தலைமறைவு… புர்காவுக்கடியில் மறைந்திருந்த உண்மை..! ஷிவா சர்மா கொலை வழக்கில் அதிரடித் திருப்பம்..!!

சிவா சர்மா மரண வழக்கில் குற்றம் சாட்டப்பட்டுள்ள சிரத்தா துபேவை, உத்தரப் பிரதேச சிறப்புப் படை நாக்பூரில் கைது செய்துள்ளது. இச்சிறப்பு நடவடிக்கைக்கு நாக்பூர் காவல் துறையும் குற்றப்பிரிவும் உதவிபுரிந்தன. காவல்துறையின் தகவன்படி, சிரத்தா கைது நடவடிக்கையிலிருந்து தப்பிக்க தொடர்ந்து தனது இருப்பிடங்களை மாற்றி வந்துள்ளார்; மேலும் தனது அடையாளத்தை மறைக்க புர்கா அணிந்து பயணம் செய்துள்ளார். விசாரணையின் போது அவர் ஆக்ரா மற்றும் ரேபரேலியில் தங்கியிருந்ததற்கான தடயங்கள் கிடைத்துள்ளன. ஆக்ராவில் உள்ள ஒரு ஹோட்டலில் தனது கூட்டாளிகளுடன் சுமார் 24 மணி நேரமும், ரேபரேலியில் சுமார் 10 மணி நேரமும் அவர் தங்கியிருந்தது தெரியவந்துள்ளது. இந்த இடங்களின் சிசிடிவி காட்சிகளும் ஹோட்டலில் பதிவு செய்யப்பட்ட விவரங்களும் தற்போது விசாரணையின் முக்கிய பகுதியாக மாறியுள்ளன.

ஆக்ராவில் உள்ள ஓம் பேலஸ் ஹோட்டலில் சிரத்தா துபே தனது கூட்டாளிகளுடன் தங்கியிருந்தது காவல்துறையின் விசாரணையில் தெரியவந்துள்ளது. அவர் ஹோட்டலில் போலியான பெயரில் நுழைவுப் பதிவைச் செய்ததாகவும், ஆனால் முகவரியாக ரேபரேலி பற்றிய தகவலைக் கொடுத்ததாகவும் கூறப்படுகிறது. இந்த ஹோட்டலுடன் தொடர்புடைய சிசிடிவி காட்சிகள் காவல்துறைக்கு கிடைத்துள்ளன, இதன் அடிப்படையில் அவர் வந்து சென்ற விபரங்களும் உடன் இருந்த நபர்களின் விவரங்களும் சேகரிக்கப்பட்டு வருகின்றன. சிரத்தா தனது சகோதரி ராஷ்மி மற்றும் டேனிஷ் என்ற தன்வீர் என்ற ஓட்டுநருடன் சேர்ந்து புர்கா அணிந்தவாறே தொடர்ந்து பயணம் செய்து வந்ததாக காவல்துறை தரப்பில் தெரிவிக்கப்பட்டுள்ளது. எஸ்டிஎஃப் அவரது இருப்பிடத்தைக் கண்டறிந்து நாக்பூர் காவல்துறையின் உதவியுடன் அவரை மடக்கிப் பிடித்தது.

விசாரணை அறிக்கையின்படி, சிரத்தா துபே கடந்த அக்டோபர் 16-ம் தேதி இரவு 11 மணியளவில் ரேபரேலி சென்றடைந்து, அக்டோபர் 17-ம் தேதி காலை 9 மணி வரை அந்நகரத்திலேயே தங்கியிருந்தார். இந்தச் சமயத்தில் அவருடன் அவரது சகோதரி ராஷ்மியும், ஓட்டுநர் டேனிஷும் உடன் இருந்தனர். ரேபரேலியில் உள்ள ஹோட்டல் பிரீத்-தில் அறை எடுக்க சிரத்தா முயன்றதாகவும், எனினும் உரிய அடையாள அட்டை வழங்கப்படாததால் அவருக்கு அறை வழங்கப்படவில்லை என்றும் கூறப்படுகிறது; இதன் பின்னர் அவர் வேறு இடங்களில் தங்குவதற்கான இடத்தைத் தேடி அலைந்துள்ளார். லக்னோ காவல் ஆணையர் தருண் காபா கூறுகையில், இவ்வழக்கில் மூன்று குற்றவாளிகளுக்கும் எதிராக ஜாமீனில் வெளிவர முடியாத பிடியாணைகள் பெறப்பட்டு, அனைவரின் மீதும் தலா 50,000 ரூபாய் சன்மானம் அறிவிக்கப்பட்டிருந்தது என்றார். நாக்பூர் நீதிமன்றத்தில் காவலில் எடுக்கும் நடைமுறைகள் முடிக்கப்பட்ட பிறகு அவர்கள் லக்னோவுக்கு அழைத்து வரப்படுவார்கள்.