“அன்பில் மகேஸைத் தொடர்ந்து கே.என். நேருவும்…?” எந்நேரமும் பாயலாம் அதிரடி கைது.. பதறும் திமுக கோட்டை..!!

தனியார் பள்ளிகளுக்கு அங்கீகாரம் வழங்க லஞ்சம் பெற்ற புகாரில் திமுக முன்னாள் அமைச்சர் அன்பில் மகேஸ் அண்மையில் கைது செய்யப்பட்டதைத் தொடர்ந்து, மற்றொரு மூத்த தலைவரான கே.என். நேருவும் கைது செய்யப்படலாம் என அரசியல் விமர்சகர்கள் கருத்து தெரிவித்து வருகின்றனர். திமுக ஆட்சிக் காலத்தில் நகராட்சி நிர்வாகத் துறையில் நடைபெற்ற சுமார் 2,538 பணி நியமனங்களில் 634 கோடி ரூபாய் வரை லஞ்சம் பெறப்பட்டதாக எழுந்த புகாரின் அடிப்படையில், முன்னாள் அமைச்சர் கே.என். நேரு உட்பட 8 பேர் மீது லஞ்ச ஒழிப்புத்துறையினர் தற்போது வழக்குப் பதிவு செய்துள்ளனர். இதனைத் தொடர்ந்து அவருக்குச் சொந்தமான மற்றும் தொடர்புடைய பல்வேறு இடங்களில் லஞ்ச ஒழிப்புத்துறையினர் அதிரடி சோதனைகளை மேற்கொண்டுள்ளதால், இந்த வழக்கில் கே.என். நேரு எந்நேரமும் கைது செய்யப்படலாம் என்ற தகவல் தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளது.

இத்தகைய அடுத்தடுத்த அதிரடி நடவடிக்கைகள், வரவிருக்கும் திருச்சி கிழக்கு சட்டமன்றத் தொகுதி இடைத்தேர்தலை இலக்காகக் கொண்டே அரங்கேற்றப்படுவதாக அரசியல் விமர்சகர்கள் மற்றும் திமுக தரப்பில் பரவலாகக் கூறப்படுகிறது. திருச்சியில் அசைக்க முடியாத பலம் கொண்ட திமுக முகங்களான அன்பில் மகேஸ் மற்றும் கே.என். நேரு ஆகியோரை குறிவைத்து முடக்குவதன் மூலம், இடைத்தேர்தல் களத்தில் திமுகவின் தேர்தல் பணிகளை பலவீனப்படுத்த தற்போதைய அரசு திட்டமிடுவதாக திமுக தலைமை குற்றம் சாட்டியுள்ளது. தேர்தல் நெருங்கும் சூழலில் திருச்சியின் முக்கியத் தலைவர்கள் மீது பாயும் இந்த லஞ்ச ஒழிப்புத்துறை நடவடிக்கைகள், அரசியல் பழிவாங்கும் நோக்கம் கொண்டதா அல்லது ஊழலுக்கு எதிரான சட்டப்படியான நடவடிக்கையா என்ற விவாதத்தை தீவிரப்படுத்தியுள்ளது.