“நான் சொன்னால் தப்பாகிவிடும்.. அவங்ககிட்டயே போய் கேளுங்க…” அன்பில் மகேஸ் கைது விவகாரத்தில் EPS கொடுத்த ட்விஸ்ட்.. அதிரும் அரசியல் களம்..!!

தனியார் பள்ளிகளுக்கு அரசு அங்கீகாரம் வழங்க லஞ்சம் பெற்றதாகக் கூறப்படும் வழக்கில், திமுக முன்னாள் அமைச்சர் அன்பில் மகேஸ் பொய்யாமொழி சென்னை மத்திய குற்றப்பிரிவு போலீசாரால் கைது செய்யப்பட்டு புழல் சிறையில் அடைக்கப்பட்டுள்ள சம்பவம் தமிழக அரசியலில் பெரும் பரபரப்பை ஏற்படுத்தியுள்ளது. கடந்த அக்டோபர் 26-ஆம் தேதி சென்னை உயர்நீதிமன்றம் அவரது முன்ஜாமீன் மனுவை நிராகரித்த சில மணி நேரங்களிலேயே இந்த அதிரடி நடவடிக்கை மேற்கொள்ளப்பட்டது. சுமார் 100 கோடி முதல் 400 கோடி ரூபாய் வரை மோசடி நடைபெற்றதாக எழுந்துள்ள இந்தக் குற்றச்சாட்டை திமுக முற்றிலும் மறுப்பதோடு, இது தங்களை ஒடுக்குவதற்காக நடத்தப்படும் ஒரு தூய அரசியல் பழிவாங்கும் நடவடிக்கை என்றும் கடுமையாக விமர்சித்துள்ளது.

இச்சம்பவம் குறித்து திருச்சியில் செய்தியாளர்களைச் சந்தித்த அதிமுக பொதுச்செயலாளரும், தமிழக எதிர்க்கட்சி தலைவருமான எடப்பாடி பழனிசாமி அவர்களிடம் செய்தியாளர்கள் கேள்வி எழுப்பினர். அதற்கு சற்றும் யோசிக்காமல் பதிலளித்த அவர், இது தங்களுக்கு முழுமையாகத் தெரியாத விஷயம் என்பதால் இதில் தலையிட்டுச் சரியான பதிலைக் கூற முடியாது என்றும், தான் ஏதாவது கூறினால் அது தவறான பதிலாகிவிடும் என்றும் குறிப்பிட்டார். மேலும், இந்த வழக்கை எதிர்கொள்பவர்களுக்கும் வழக்குத் தொடுத்தவர்களுக்கும் தான் இதன் முழு விவரம் தெரியும் என்பதால், இதுபற்றிக் கூடுதல் விபரங்களை ஒன்று தவெகவிடமோ அல்லது திமுகவிடமோதான் கேட்க வேண்டும் என்று கூறி எஸ்கேப் ஆனார்.

முன்னதாக தமிழகத்தில் நிலவும் தொடர் மின்வெட்டுப் பிரச்சினை குறித்தும், மதுரை மீனாட்சி அம்மன் கோவிலில் தான் தரிசனம் செய்தபோது ஏற்பட்ட திடீர் மின்வெட்டு குறித்தும் எடப்பாடி பழனிசாமி மாநில அரசை வன்மையாகக் கண்டித்தார். அப்போது, 2006-2011 வரையிலான திமுக ஆட்சிக் காலத்திலும் மிகக் கடுமையான மின்வெட்டு நிலவியதை சுட்டிக்காட்டிய அவர், மறைந்த முன்னாள் முதல்வர் ஜெயலலிதா தனது திட்டமிட்ட செயல்பாடுகளால் தமிழகத்தை மின்மிகை மாநிலமாக மாற்றிக் காட்டினார் என்பதை நினைவு கூர்ந்தார். ஆனால், தற்போதைய தவெக அரசு எந்தவிதத் திட்டமிடலும் இல்லாமல் செயல்படுவதாகவும், மின்துறை அமைச்சர் கடவுளிடமே பொய் சொல்லும் அளவிற்கு மழுப்புவதாகவும் எடப்பாடி பழனிசாமி தனது கடுமையான சாடல்களைப் பதிவு செய்தார்.