“நெகிழ்ச்சி சம்பவம்.. உலகை விட்டுப் பிரிந்தாலும்… 3 பேருக்கு ஒளியேற்றிய 16 வயது சிறுவன்..!” அரசு மருத்துவமனையில் முதன்முறையாக நிகழ்த்தப்பட்ட அதிசயம்..!!

சாலை விபத்தில் படுகாயமடைந்த 16 வயது சிறுவன் மோனு குமார் சிகிச்சைப் பலனின்றி உயிரிழந்தாலும், அவனது பெற்றோரின் துணிச்சலான முடிவால் மூன்று குடும்பங்களின் வாழ்வில் புதிய நம்பிக்கை துளிர்விட்டுள்ளது. பாட்னா புனைசக், அனுமன் நகரைச் சேர்ந்த சுபாஷ் குமாரின் மகனான மோனு, கடந்த அக்டோபர் 19 அன்று விபத்தில் சிக்கினார். மேதாந்தா மருத்துவமனையில் முதற்கட்ட சிகிச்சைக்குப் பிறகு நிலைமை மேம்படாததால், பாட்னாவில் உள்ள இந்திரா காந்தி மருத்துவ அறிவியல் நிறுவனத்திற்கு மாற்றப்பட்டார். அங்கு தீவிர பரிசோதனைக்குப் பிறகு, தலையில் ஏற்பட்ட பலத்த காயம் காரணமாக அவரது மூளை செயல்படுவதை நிறுத்திவிட்டதாக மருத்துவர்கள் தெரிவித்து, அவரை ‘பிரைன் டெத்’ அடைந்ததாக உறுதிப்படுத்தினர். மகனை இழந்துவிட்ட சோகத்திலும், அவனது உறுப்புகளைத் தானம் செய்ய பெற்றோர் சம்மதித்தனர்.

மோனுவின் இந்த உறுப்பு தானத்தின் மூலம் மூன்று நோயாளிகளுக்குப் புதிய வாழ்க்கை கிடைத்துள்ளது; இதில் ஒரு கல்லீரலும், இரண்டு சிறுநீரகங்களும் அடங்கும். IGIMS-ன் இரைப்பை குடல் அறுவை சிகிச்சை மற்றும் கல்லீரல் மாற்று அறுவை சிகிச்சை துறையின் தலைவர் டாக்டர் மனிஷ் மண்டல் தலைமையிலான நிபுணர் மருத்துவர்கள் குழு, 19 வயது இளம் பெண்ணுக்கு வெற்றிகரமாக கல்லீரல் மாற்று அறுவை சிகிச்சையை மேற்கொண்டது. மேலும், மோனுவின் ஒரு சிறுநீரகம் IGIMS-ல் அனுமதிக்கப்பட்ட நோயாளிக்கும், மற்றொரு சிறுநீரகம் பாட்னா ESIC மருத்துவமனையில் அனுமதிக்கப்பட்ட நோயாளிக்கும் வெற்றிகரமாகப் பொருத்தப்பட்டது. இதில் IGIMS மருத்துவக்குழுவினர் உரிய தொழில்நுட்ப உதவியை வழங்கினர்.

இந்த நிகழ்வின் மிகப்பெரிய மைல்கல்லாக, பீகாரில் முதன்முறையாக அரசுச் செலவில் IGIMS மருத்துவமனையில் கல்லீரல் மாற்று அறுவை சிகிச்சை வெற்றிகரமாக முடிக்கப்பட்டுள்ளது. கல்லீரல் மாற்று அறுவை சிகிச்சை போன்ற மிகச் சிக்கலான மருத்துவ முறை அரசு மருத்துவமனையில் சாத்தியமாகியிருப்பது பீகாரின் மருத்துவத் துறை வரலாற்றில் ஒரு பெரிய சாதனையாகக் கருதப்படுகிறது. மோனுவின் பெற்றோரின் இந்த மகத்தான மற்றும் துணிச்சலான முடிவு, உறுப்பு தானம் மற்றும் அரசு மருத்துவ நிறுவனங்களின் சிறப்புச் சேகரிப்பு மூலம் எத்தனை விலைமதிப்பற்ற உயிர்களைக் காப்பாற்ற முடியும் என்பதற்கு ஒரு சிறந்த சான்றாகியுள்ளது.