அடக்கடவுளே..! செல்ல நாய்க்குட்டியைக் காப்பாற்ற முயன்று… வெள்ளத்தில் அடித்துச் செல்லப்பட்ட 13 வயது சிறுவன்..! அசாமில் நெஞ்சை பிழியும் சோகம்..!!

அசாமில் ஏற்பட்ட பேரழிவு வெள்ளத்தில் 13 வயதான ஹ்ரிதிப் பணிக்கா என்ற ஏழாம் வகுப்பு மாணவன், தனது மூன்று மாத நாய்க்குட்டியைக் காப்பாற்ற முயன்றபோது வெள்ள நீரில் அடித்துச் செல்லப்பட்டு பரிதாபமாக உயிரிழந்தான். சிவசாகர் மாவட்டத்தில் உள்ள பமுன்புகுரி தேயிலைத் தோட்டத்தில், நதி நீர் மற்றும் கனமழை காரணமாக வீடு வெள்ளத்தில் மூழ்கியபோது, ஹ்ரிதிப்பின் தந்தை அவனை உறவினர் வீட்டிற்குச் செல்லப் பணித்தார். ஆனால், தனது செல்ல நாய்க்குட்டியான ‘வருண்’ என்பதை விட்டுவர மறுத்த சிறுவன், அதனையும் உடன் அழைத்துச் செல்ல முயன்றான். தந்தை சான்றிதழ்களை எடுக்க வீட்டிற்குள் சென்ற சில நிமிடங்களில் வெள்ளத்தின் சீற்றம் அதிகரித்து, சிறுவன் நீரோட்டத்தில் அடித்துச் செல்லப்பட்டான். நாய்க்குட்டி உயிர்தப்பிய நிலையில், ஹ்ரிதிப் உயிரிழந்தான்.

மகனை இழந்து தவிக்கும் ஹ்ரிதிப்பின் தாய், இயற்கை பேரிடர் காலங்களில் பெற்றோர்கள் தங்களது குழந்தைகளைத் தனியாக விடாமல் அருகிலேயே வைத்திருக்க வேண்டும் என்று கண்ணீர் மல்க வேண்டுகோள் விடுத்துள்ளார். அசாமில் சமீபத்தில் பெய்த கடும் மழை மற்றும் மேகவெடிப்பினால் ஏற்பட்ட இந்த வெள்ளப் பெருக்கு காரணமாக 7 லட்சத்திற்கும் அதிகமான மக்கள் பாதிக்கப்பட்டனர். ஆகஸ்ட் 1 நிலவரப்படி, வெள்ளத்திற்குப் பலியானோரின் எண்ணிக்கை 82 ஆக உயர்ந்துள்ளது. சுமார் 1.93 லட்சம் மக்கள் இன்னமும் பாதிப்பில் உள்ள நிலையில், 13,000 மக்கள் நிவாரண முகாம்களில் தங்கியுள்ளனர்.

தற்போது பல பகுதிகளில் வெள்ள நீர் வடியத் தொடங்கினாலும், திக்ஹோ மற்றும் தன்சிரி போன்ற ஆறுகள் இன்னும் அபாய கட்டத்தைத் தாண்டி ஓடிக்கொண்டிருக்கின்றன. மாநில அரசு சார்பில் உயிரிழந்தவர்களின் குடும்பங்களுக்கு ரூ.9 லட்சம் நிவாரணத் தொகையும், வெள்ளத்தால் பாதிக்கப்பட்ட மக்களுக்கு 6 மாதக் கடன் ஒத்திவைப்பும் அறிவிக்கப்பட்டுள்ளது. NDRF, SDRF, ராணுவம் மற்றும் மாநில அமைப்புகளைச் சேர்ந்த மீட்புக் குழுவினர் தொடர்ந்து நிவாரணப் பணிகளிலும், உட்கட்டமைப்புகளைச் சீரமைக்கும் பணிகளிலும் ஈடுபட்டு வருகின்றனர்.