“போனா போகுதுடா விடு… ” வேலை போயிடுச்சுன்னு உடைஞ்சு போய் வீடியோ கால் பண்ணிய மகன்… சிரிச்சிக்கிட்டே தந்தை சொன்ன அந்த ஒரு வார்த்தை..! கலங்க வைக்கும் வைரல் வீடியோ..!!

நிறுவனங்களுக்கு நாம் வெறும் ஒரு ஊழியர் எண்ணாக மட்டுமே இருக்கலாம், ஆனால் நமது குடும்பத்திற்கு நாம் தான் எல்லாமே என்பதை உணர்த்தும் ஒரு வீடியோ சமூக வலைதளங்களில் வைரலாகி வருகிறது. உத்தரப் பிரதேசத்தைச் சேர்ந்த கைஷ் அன்சாரி என்ற ஐடி ஊழியர் வெளிநாட்டில் பணியாற்றி வந்த நிலையில், திடீரென பணிநீக்கம் செய்யப்பட்டார். அனுபவமும் உழைப்பும் இருந்தாலும் திடீரென வேலை போவது ஒருவரை மனரீதியாக உலுக்கி, தன் தகுதி மீதே சந்தேகத்தை ஏற்படுத்திவிடும். பல நாட்கள் தயக்கத்திற்குப் பிறகு, தன் தந்தைக்கு வீடியோ கால் மூலம் தொடர்பு கொண்டு வேலை போன விஷயத்தைக் கூறினார். அதைக் கேட்டு அதிர்ச்சியடையாத அவரது தந்தை, பெரிய புன்னகையுடன், “எங்கு எவ்வளவு நாள் நமக்கு உணவு எழுதப்பட்டுள்ளதோ அவ்வளவுதான் கிடைக்கும், இறைவன் எதைச் செய்தாலும் நன்மைக்கே செய்வார், வருத்தப்படாதே” என்று கூறி ஆறுதல் அளித்தார்.

இந்த வீடியோவை கைஷ் அன்சாரி தனது இன்ஸ்டாகிராம் பக்கத்தில் பகிர்ந்துள்ளார். அவர் அதில், “யாரிடமும் அனுதாபம் தேடுவதற்காக நான் இதைப் பகிரவில்லை; சவாலான காலகட்டத்தைக் கடந்து செல்பவர்களுக்குத் தங்கள் குடும்பம் எப்போதும் கூடவே இருக்கும் என்பதை நினைவூட்டவே பகிர்ந்தேன்” என்று குறிப்பிட்டுள்ளார். வேலை இழப்பு என்பது உங்கள் திறமைக்கான சான்றிதழ் அல்ல, அது வாழ்க்கையின் ஒரு பகுதிதானே தவிர வாழ்க்கையின் முடிவல்ல. தந்தையின் இந்த அன்பான வார்த்தைகளும் புன்னகையும் அவரது மன அழுத்தத்தைப் போக்கி, மீண்டும் எழுந்து நிற்கும் துணிவையும் தன்னம்பிக்கையையும் கொடுத்துள்ளது.

https://www.instagram.com/reel/DcSxUkBADUr/?utm_source=ig_web_button_share_sheet

இந்த உணர்ச்சிப்பூர்வமான வீடியோவைக் கண்ட இணையவாசிகள் தந்தையின் மனப்பான்மையைப் பெரிதும் பாராட்டி வருகின்றனர். “ஒரு தந்தை மட்டுமே மகனுக்கு இப்படிப்பட்ட பெரிய நிம்மதியையும் தைரியத்தையும் தர முடியும்” என்றும், “அவரது புன்னகைக்குப் பின்னால் ‘கவலைப்படாதே, நான் உனக்கு இருக்கிறேன்’ என்ற பெரிய செய்தி ஒளிந்திருக்கிறது” என்றும் நெட்டிசன்கள் கருத்து தெரிவித்து வருகின்றனர். வேலை இழப்பு, நேர்காணலில் தோல்வி அல்லது நிதி நெருக்கடியைச் சந்திப்பவர்கள் யாரும் தனிமையில் இல்லை என்பதை இந்தச் சம்பவம் உணர்த்துகிறது.