“ஒரு டிரஸ்ஸ வச்சு கலாச்சாரத்த எட போடாதீங்க..! பொண்ணுங்கள தொந்தரவு பண்றத முதல்ல நிறுத்துங்க..!” GIVA விளம்பரச் சர்ச்சையில் கிருதி சனோனுக்கு ஆதரவாக களமிறங்கி மாஸ் காட்டிய ராகுல் காந்தி..!!

நகை பிராண்டான GIVA-வின் ரக்ஷா பந்தன் விளம்பரத்தில் நடிகை கிருதி சனோன் அணிந்திருந்த உடை தொடர்பாக எழுந்த விமர்சனங்கள் மற்றும் சமூக வலைதளங்களின் எதிர்மறையான கருத்துகளுக்கு மத்தியில், காங்கிரஸ் தலைவர் ராகுல் காந்தி கிருதி சனோனுக்கு தனது ஆதரவைத் தெரிவித்துள்ளார். ஆகஸ்ட் 25 செவ்வாய்க்கிழமை அன்று தனது இன்ஸ்டாகிராம் பக்கத்தில் பதிவிட்ட ராகுல் காந்தி, “ஒரு பெண் என்ன உடை அணிகிறாள், என்ன செய்கிறாள், எங்கு செல்கிறாள் என்பது அவளுடைய தனிப்பட்ட விருப்பம். பெண்களின் சுதந்திரத்திற்கு மதிப்பளித்து, அவர்களை இப்படி ட்ரோல் செய்வதை நிறுத்துங்கள்” என்று குறிப்பிட்டுள்ளார். GIVA விளம்பரத்தில் கிருதி சனோன் அணிந்திருந்த பிராலெட் பாணி பிளவுஸ் மற்றும் ஸ்கர்ட் ஆடைக்கு எதிர்ப்புகள் கிளம்பிய நிலையில், ராகுல் காந்தியின் இந்த கருத்து பெண்களின் தனிப்பட்ட சுதந்திரத்திற்கு ஆதரவாக அமைந்துள்ளது.

இந்த விமர்சனங்களுக்குப் பதிலளித்த கிருதி சனோன், ஒரு பெண் அணியும் உடையைக் கொண்டு அவர் தனது கலாச்சாரத்திற்குத் தரும் மரியாதையைக் கணிக்கும் பழக்கத்தைக் கேள்வி எழுப்பியுள்ளார். பண்டிகைகளின் சாரம்சம் ஆடைகளில் இல்லை, பாரம்பரியத்தின் மீது நாம் வைத்திருக்கும் உணர்வுகளில்தான் உள்ளது என்று குறிப்பிட்ட அவர், ரக்ஷா பந்தன் என்பது பாதுகாப்பின் பிணைப்பு என்றும், தானும் தனது சகோதரி நூபுர் சனோனும் தங்களுக்குள்ளேயே ராகி கட்டிக் கொள்வதாகவும் தெரிவித்துள்ளார். விளம்பரத்தில் ஒரு நாய் இடம்பெற்றது குறித்துப் பேசிய அவர், தங்கள் செல்லப் பிராணிகளும் குடும்பத்தின் ஒரு பகுதிதான் என்பதால் பாதுகாப்பின் பிணைப்பு அவற்றுக்கும் பொருந்தும் எனக் கூறியுள்ளார்.

https://media.assettype.com/freepressjournal/2026-08-25/j6n8tbsc/Screenshot-2026-08-25-212407.png

மேலும் தொடர்ந்த கிருதி சனோன், “பெண்கள் என்ன அணிய வேண்டும் என்று சொல்வதை எப்போது நிறுத்தப் போகிறோம்? காலப்போக்கில் பாரம்பரிய ஃபேஷன் எவ்வளவோ மாறினாலும், பெண்களின் கலாச்சார மரியாதை இன்னமும் அவர்களின் உடைகளின் மூலமே அளவிடப்படுகிறது. கலாச்சாரமும் பாரம்பரியமும் இதயத்தில் இருக்க வேண்டுமே தவிர, உடைகளின் கழுத்து அமைப்பில் அல்ல!” என்று ஆவேசமாகத் தெரிவித்தார். கிருதி சனோனின் இந்தப் பதில் பெண்கள் தங்கள் உடைகளைத் தேர்ந்தெடுக்கும் சுதந்திரம் குறித்த விவாதத்தை ஏற்படுத்திய நிலையில், ராகுல் காந்தியின் ஆதரவுப் பதிவு இந்த விவகாரத்தில் ஒரு அரசியல் பரிமாணத்தையும் சேர்த்துள்ளது.