பகீர்.. பூட்டிய அறை… கதவைத் திறந்து பார்த்த போலிஸுக்குக் காத்திருந்த பேரதிர்ச்சி..! மொராதாபாத்தில் பரபரப்பை ஏற்படுத்திய பெண் ஊழியரின் மர்ம மரணம்..!!

உத்தரப் பிரதேச மாநிலம் மொராதாபாத் மாவட்டம், சிவில் லைன்ஸ் காவல் எல்லைக்குட்பட்ட ஹிம்கிரி காலனியில் உள்ள வாடகை அறையில், 26 வயதான வங்கி ஊழியர் பிரதீபா ராணா சந்தேகத்திற்கிடமான முறையில் சடலமாக மீட்கப்பட்டது பெரும் பரபரப்பை ஏற்படுத்தியுள்ளது. அம்ரோஹாவைச் சேர்ந்த இவர், மொராதாபாத்தில் உள்ள ஆக்சிஸ் வங்கியின் கடன் பிரிவில் பணியாற்றி வந்தார். சம்பவ இடத்திற்கு வந்த காவல்துறையினர் சடலத்தைக் கைப்பற்றி பிரேதப் பரிசோதனைக்கு அனுப்பி வைத்து விசாரணையைத் தொடங்கியுள்ளனர்.

பிரதீபா ராணாவுடன் தங்கியிருந்த பெண்களும், அவருடைய சக ஊழியர்களும் கதவை நீண்ட நேரமாகத் தட்டியும், தொடர்ந்து தொலைபேசியில் அழைத்தும் உள்ளிருந்து எந்தப் பதிலும் வரவில்லை. இதனால் அசம்பாவிதம் ஏதும் நடந்திருக்குமோ என்ற அச்சத்தில் அவர்கள் உடனடியாக ‘யுபி 112’ உதவி எண்ணிற்குத் தகவல் தெரிவித்தனர். தகவலறிந்து சம்பவ இடத்திற்கு விரைந்த சிவில் லைன்ஸ் காவல் துறையினர், பிரதீபாவின் குடும்பத்தினரையும் வரவழைத்தனர். குடும்பத்தினர் மற்றும் சாட்சிகளின் முன்னிலையில் பூட்டிய அறையின் கதவு திறக்கப்பட்டபோது, பிரதீபா சடலமாகக் கிடப்பது கண்டறியப்பட்டது.

சம்பவ இடத்தில் தடயவியல் குழு மற்றும் மோப்ப நாய் படையினர் சோதனை நடத்தி ஆதாரங்களைச் சேகரித்தனர். அங்கு எந்தவொரு தற்கொலை குறிப்பும் கிடைக்கவில்லை. இதுகுறித்து மொராதாபாத் நகர எஸ்பி குமார் ரண்விஜய் சிங் கூறுகையில், பிரதீபாவின் மொபைல் போன் மற்றும் தனிப்பட்ட பொருட்கள் தீவிர ஆய்வுக்கு உட்படுத்தப்பட்டுள்ளதாகவும், அவருடைய வங்கியின் சக ஊழியர்கள், வீட்டு உரிமையாளர் மற்றும் அண்டை வீட்டாரிடம் விசாரணை நடத்தப்பட்டு வருவதாகவும் தெரிவித்தார். பிரேதப் பரிசோதனை அறிக்கை வந்த பிறகே இறப்பிற்கான உண்மையான காரணம் தெரியவரும் என்று காவல்துறையினர் தெரிவித்துள்ளனர்.