“டெக்னாலஜி.. ஆ வந்துடிச்சு!” 15 நிமிஷத்துல ஏர் பிரையர் ஆர்டர் செய்த பாட்டி… பேத்தி சொல்லிக்கொடுத்த கியூட் வீடியோ வைரல்..!!

இன்றைய டிஜிட்டல் யுகத்தில் முதியவர்கள் ஸ்மார்ட்போன் செயலிகளைப் பயன்படுத்துவது சவாலாக இருக்கும் நிலையில், ஒரு பாட்டி தனது பேத்தியின் உதவியுடன் ஆன்லைனில் மளிகைப் பொருட்களை ஆர்டர் செய்யக் கற்கும் நெகிழ்ச்சியான வீடியோ சமூக வலைதளங்களில் வைரலாகி வருகிறது. சான்யா உசேன் என்ற இன்ஸ்டாகிராம் கிரியேட்டர் பகிர்ந்துள்ள இந்த வீடியோவில், அவர் தனது பாட்டிக்கு ‘பிளின்கிட்’ செயலியை எப்படிப் பயன்படுத்துவது என்று மிகவும் பொறுமையாக, படிப்படியாகக் கற்றுக் கொடுக்கிறார்.

https://www.instagram.com/reel/Ddi_UTLp6P-/?utm_source=ig_web_button_share_sheet

அந்தப் பாட்டி வாய்ஸ் அசிஸ்டென்ட் மூலமாகவும், டைப் செய்தும் தனக்குத் தேவையான ஷாம்பு, காபி, வெண்ணெய் போன்ற பொருட்களைத் தேடித் தேர்ந்தெடுத்தார். மேலும், விளையாட்டுத் தனமாகத் தனது விருப்பப் பட்டியலில் ஒரு ஏர் பிரையரையும் சேர்த்துக் கொண்டார். இறுதியாக ஆன்லைன் மூலம் பணம் செலுத்தி ஆர்டர் செய்த பிறகு, வெறும் 15 நிமிடங்களில் அந்த ஏர் பிரையர் வீட்டு வாசலுக்கு வந்து சேர்ந்தது. அதைப் பார்த்ததும் “ஏர் பிரையர் வந்துவிட்டது, இதுதான் தொழில்நுட்பம்!” என்று பாட்டி துள்ளிக் குதித்த அழகான தருணம் பார்ப்பவர்களின் நெஞ்சங்களை உருக வைத்துள்ளது.

இணையத்தில் வேகமாகப் பரவி வரும் இந்த வீடியோவை லட்சக்கணக்கான மக்கள் ரசித்து பாட்டியின் கற்கும் ஆர்வத்தைப் பாராட்டி வருகின்றனர். இந்த கியூட்டான வீடியோவைப் பார்த்த பிளின்கிட் நிறுவனத்தின் அதிகாரப்பூர்வக் குழுவும் நெகிழ்ந்துபோய், “10-க்கு 11 மதிப்பெண் பெறும் மாணவி நானி ஜி, உங்களை நினைத்துப் பெருமைப்படுகிறோம்” என்று பாசத்துடன் கமெண்ட் செய்துள்ளது.