யாரும் எதிர்பாராத டுவிஸ்ட்..! தன் மகன் பட ஆடியோ லாஞ்சில் கலந்துகொள்ளும் முதலமைச்சர் விஜய்..? ‘சிக்மா’ மேடையில் அரங்கேறப்போகும் மாஸ் சம்பவம்…!!

முதலமைச்சர் விஜயின் மகன் ஜேசன் சஞ்சய் இயக்குநராக அறிமுகமாகும் ’சிக்மா’ திரைப்படத்தின் ஆரம்பக்கட்ட பணிகள் தற்போது மிகத் தீவிரமாக நடைபெற்று வருகின்றன. தமிழ் திரையுலகில் முன்னணி தயாரிப்பு நிறுவனமான லைகா புரொடக்ஷன்ஸ் தயாரிக்கும் இத்திரைப்படம், அறிவிக்கப்பட்ட நாள் முதலே ரசிகர்கள் மற்றும் சினிமா வட்டாரங்களில் பெரும் எதிர்பார்ப்பைக் கிளப்பியுள்ளது. தாத்தா எஸ்.ஏ.சந்திரசேகர், தந்தை விஜய் ஆகியோரின் பிரம்மாண்ட அடையாளங்களைச் சாராமல், ஒரு இயக்குநராகத் தனக்கென ஒரு தனிப் பாதையை உருவாக்கிக் கொள்ளும் சஞ்சய்யின் முயற்சிக்கு பலரும் பாராட்டு தெரிவித்து வருகின்றனர்.

இந்தத் தனித்துவமான முயற்சியின் ஒரு பகுதியாக, சமீபத்தில் வெளியான படத்தின் ஃபர்ஸ்ட் லுக் போஸ்டர் சமூக வலைதளங்களில் பெரும் கவனத்தைப் பெற்றது. பொதுவாக வாரிசு நடிகர்கள் அல்லது இயக்குநர்கள் தங்களின் பெயருக்குப் பின்னால் தந்தை அல்லது குடும்பத்தின் அடையாளங்களைச் சேர்ப்பது வழக்கம். ஆனால், சஞ்சய் தனது முதல் படத்தின் போஸ்டரிலேயே தந்தையான விஜயின் இனிஷியலைத் தவிர்த்து, வெறும் ‘ஜேசன் சஞ்சய்’ என்று மட்டுமே குறிப்பிட்டிருந்தார். இது அவர் தன் சொந்த உழைப்பிலும் திறமையிலும் மட்டுமே ஜெயிக்க விரும்புகிறார் என்பதைத் தெளிவாகக் காட்டியதுடன், இணையத்தில் பேசுபொருளாகவும் மாறியது.

இந்நிலையில், படத்தின் அடுத்தகட்ட நகர்வாக விரைவில் நடைபெற உள்ள ஆடியோ வெளியீட்டு விழா குறித்த சுவாரசியமான தகவல் ஒன்று கோலிவுட்டில் பரவி வருகிறது. இந்த விழாவில் சஞ்சய்யை வாழ்த்துவதற்காக அவரது தந்தையும், தமிழக முதலமைச்சருமான விஜய் சிறப்பு விருந்தினராகப் பங்கேற்க வாய்ப்புள்ளதாகக் கூறப்படுகிறது. ஒருவேளை முதலமைச்சர் விஜய் இந்த விழாவில் கலந்து கொண்டால், அது அரசியல் மற்றும் சினிமா என இரு தரப்பிலும் மிகப்பெரிய நிகழ்வாக மாறும் என்பதால், ஒட்டுமொத்த கோலிவுட்டும் இந்த ஆடியோ வெளியீட்டு விழாவை நோக்கி மிகுந்த எதிர்பார்ப்புடன் காத்துக் கொண்டிருக்கிறது.