ஒரே இரவில் மாறிய சாதி… கைமாறிய கோடிகள்..! பாஜக அமைச்சரின் மெகா லேண்ட் டீலை அம்பலப்படுத்திய காங்கிரஸ்..!!

சத்தீஸ்கர் மாநிலத்தின் ராய்ப்பூர் நகர வளர்ச்சி ஆணையத்தின் கச்னா நில ஒதுக்கீடு தொடர்பாக காங்கிரஸுக்கும் ஆளும் பாஜகவுக்கும் இடையே தீவிர அரசியல் மோதல் ஏற்பட்டுள்ளது. காங்கிரஸ் மருத்துவப் பிரிவின் தலைவர் ராகேஷ் குப்தா குற்றஞ்சாட்டுகையில், பழங்குடியின தலைவரும் வனத்துறை அமைச்சருமான கேதார் காஷ்யப்பின் மனைவியுடன் தொடர்புடைய ‘ராதிகா பேலஸ் பிரைவேட் லிமிடெட்’ நிறுவனத்திற்கு 1.33 ஏக்கர் நிலத்திற்கு பதிலாக 23,327 சதுர அடி நிலம் ஒதுக்கப்பட்டுள்ளது என்று தெரிவித்துள்ளார். மேலும், அரசுப் பதிவேடுகளில் தனது சாதியை “பொதுப் பிரிவு” எனக் குறிப்பிட்டு, கோடிக்கணக்கான ரூபாய் மதிப்புள்ள வணிக ரீதியிலான நிலப்பகுதியைப் பெற அமைச்சர் தனது செல்வாக்கைப் பயன்படுத்தியதாகக் காங்கிரஸ் குற்றம்சாட்டியுள்ளது.

சந்திப்புச் சாலைக்கு அருகே 150 அடி அகலமுள்ள முக்கிய சாலையில் அமைந்துள்ள இந்த நிலத்தின் சந்தை மதிப்பு பல கோடிகளைத் தாண்டும் என்று காங்கிரஸ் சுட்டிக்காட்டியுள்ளது. குறைந்த மதிப்புள்ள நிலத்திற்குப் பதிலாக அதிக மதிப்புள்ள பிரதான நிலத்தை அமைச்சரின் அதிகாரத் தொடர்புகளால் ஒதுக்கீடு செய்துள்ளதாகக் காங்கிரஸ் கூறியுள்ளது. பழங்குடியின அமைச்சராக இருந்துகொண்டு, இந்த நிலப் பரிவர்த்தனைக்காக அரசு ஆவணங்களில் சாதியை தவறாகக் காட்டியதாகக் கூறி, காங்கிரஸ் கட்சியினர் அம்மாநில அரசுக்கும் வனத்துறை அமைச்சருக்கும் எதிராக கடும் கண்டனங்களை எழுப்பி வருகின்றனர்.

இந்த குற்றச்சாட்டுகளை பாரதிய ஜனதா கட்சி திட்டவட்டமாக மறுத்துள்ளது. பாஜக செய்தித் தொடர்பாளர் சிவ்ஷங்கர் பாண்டே மற்றும் ராய்ப்பூர் வளர்ச்சி ஆணையத்தின் துணைத் தலைவர் ஜே.பி. சர்மா ஆகியோர் செய்தியாளர் சந்திப்பில் பேசுகையில், அமைச்சர் கேதார் காஷ்யப்பின் புகழுக்குக் களங்கம் விளைவிக்கவே காங்கிரஸ் இத்தகைய பொய்க் குற்றச்சாட்டுகளைச் சுமத்துவதாகக் கூறினர். நகர வளர்ச்சி திட்ட விதிகளின்படி, கையகப்படுத்தப்பட்ட நிலத்தில் 60% RDA வசம் வைக்கப்பட்டு, 40% நில உரிமையாளர்களுக்கு வழங்கப்பட்டுள்ளதாகவும், பெரிய நிலப்பரப்புகளுக்கு முக்கியச் சாலையோரப் பகுதியே ஒதுக்கப்படும் என்றும் விளக்கமளித்தனர். மேலும், காங்கிரஸ் தலைவர் ஆனந்த் குக்ரேஜாவிற்கும் இதேபோன்று முக்கியச் சாலையில் 80,000 சதுர அடிக்கும் அதிகமான நிலம் ஒதுக்கப்பட்டதை மேற்கோள்காட்டி, இந்த ஒதுக்கீடு முற்றிலும் விதிகளுக்கு உட்பட்டே நடந்துள்ளது என்று பாஜக பதிலளித்துள்ளது.