மனிதநேயம் எங்கே போனது..? அரசுமருத்துவமனையில் 24 மணி நேரமாக நரக வேதனை… குப்பைக் கிடங்கில் வீசப்பட்ட காயமடைந்த முதியவர் – வைரலாகும் அதிர்ச்சி வீடியோ.!!

உத்தரப் பிரதேச மாநிலம் ஜாலான் மாவட்டத்தின் உராய் பகுதியில் உள்ள அரசு மருத்துவக் கல்லூரி வளாகத்தில், அடையாளந் தெரியாத காயமடைந்த முதியவர் ஒருவர் சுமார் 24 மணி நேரத்திற்கும் மேலாகக் குப்பைக் கிடங்கில் உயிருடன் தவித்து வந்த நெஞ்சைப் பதறவைக்கும் சம்பவம் வெளிச்சத்திற்கு வந்துள்ளது. அந்த முதியவர் அங்குள்ள மகப்பேறு பிரிவுக்கு எதிரே உள்ள சாக்கடை ஓரத்திலிருந்த குப்பை மேட்டில் வீசப்பட்டுக் கிடந்துள்ளார்.

அங்குள்ள மருத்துவமனை ஊழியர்கள் அவருக்கு எந்தவொரு முறையான முதலுதவியோ அல்லது சிகிச்சையோ வழங்காமல் அலட்சியமாக இருந்துள்ளதாகக் குற்றம் சாட்டப்பட்டுள்ளது. திங்கட்கிழமை மாலை சுமார் 6:30 மணியளவில் எடுக்கப்பட்ட இந்தச் சம்பவத்தின் வீடியோ சமூக வலைத்தளங்களில் வெளியாகிப் பெரும் பரபரப்பை ஏற்படுத்தியது. அந்த வீடியோவில், சுற்றியிருந்த குப்பைகளுக்கு நடுவே அந்த முதியவர் உயிருக்குப் போராடியபடி மூச்சுவிட்டுக் கொண்டிருப்பது துல்லியமாகப் பதிவாகியிருந்தது.

இந்த வீடியோ இணையத்தில் காட்டுத்தீயாகப் பரவி, மருத்துவக் கல்லூரி நிர்வாகத்தின் மனிதநேயமற்ற அலட்சியப் போக்குக்கு எதிராகப் பொதுமக்கள் மத்தியில் கடும் கொந்தளிப்பை ஏற்படுத்தியது. நிலைமை தீவிரமடைந்ததை அடுத்து, உடனடியாக விழித்துக்கொண்ட மருத்துவமனை அதிகாரிகள் அந்த முதியவரை மீட்டு அவசரப் பிரிவில் அனுமதித்துச் சிகிச்சையளிக்கத் தொடங்கியுள்ளனர்.