“8 மடங்கு போதை.. போலி நம்பர் பிளேட்..!” நடுரோட்டில் ஐ10 காரை தலைகீழாக கவிழ்த்த ஃபார்ச்சூனர்.. கல்லூரி மாணவனின் வெறித்தனம்.. நெஞ்சை பதறவைக்கும் வீடியோ..!!

ஹைதராபாத்-வாரங்கல் தேசிய நெடுஞ்சாலையில் மேட்சல்-மல்காஜ்கிரி மாவட்டம் மேடிபள்ளி காவல் நிலைய எல்லைக்குட்பட்ட பீர்ஜாடிகுடா பகுதியில், நேற்று அதிகாலை சொகுசு போர்டு நிறுவனத்தின் டொயோட்டா ஃபார்ச்சூனர் கார் ஒன்று ஹூண்டாய் ஐ10 காரின் பின்புறத்தில் அதிவேகமாக மோதி விபத்தை ஏற்படுத்தியுள்ளது. உப்பல்-நாரபள்ளி மேம்பாலத்தின் தூண் எண் 57க்கு அருகே உள்ள ஹெச்பி பெட்ரோல் பங்க் அருகில் இந்த விபத்து நிகழ்ந்துள்ளது. ஃபார்ச்சூனர் காரை ஓட்டிவந்த மாணவர் அகுன் சபர்வால், அனுமதிக்கப்பட்ட அளவை விட சுமார் 8 மடங்கு அதிகமாக மது அருந்திவிட்டு, அதிவேகமாக காரை இயக்கியதால் கட்டுப்பாட்டை இழந்து இந்த விபத்து நேரிட்டுள்ளது. மோதிய வேகத்தில் ஐ10 கார் தலைகீழாகக் கவிழ்ந்த நிலையில், ஃபார்ச்சூனர் காரும் கட்டுப்பாட்டை இழந்து அருகில் இருந்த மின் கம்பத்தின் மீது மோதியது. இதில் மின் கம்பம் உடைந்து ஃபார்ச்சூனர் காரின் மீதே விழுந்த கொடூரக் காட்சிகள் அங்குள்ள சிசிடிவி கேமராவில் பதிவாகியுள்ளது.

இந்த விபத்தின் போது ஐ10 காரில் எல்.பி. நகரிலிருந்து வாரங்கல் மாவட்டத்திலுள்ள நர்சம்பேட்டைக்குத் தம்பதியராகப் பயணம் செய்த சாய் சிவா (30) மற்றும் அவரது மனைவி மேக்னா (28) ஆகியோர் படுகாயமடைந்தனர். அவர்கள் உடனடியாக மீட்கப்பட்டு சைதன்யாபுரியில் உள்ள ஓசோன் மருத்துவமனையில் சிகிச்சைக்காக அனுமதிக்கப்பட்டனர். அதிர்ஷ்டவசமாக இந்த விபத்தில் யாருக்கும் உயிரிழப்பு ஏற்படவில்லை. விபத்தை ஏற்படுத்திய இடைநிலை வகுப்பு படிக்கும் மாணவரான அகுன் சபர்வால் என்பவரைக் காவல்துறையினர் கைது செய்து விசாரித்தபோது, அவரிடம் ஓட்டுநர் உரிமம் இல்லை என்பதும், அவர் ஓட்டி வந்த ஃபார்ச்சூனர் காரில் போலி நம்பர் பிளேட் பயன்படுத்தப்பட்டிருந்ததும் அம்பலமானது. இதையடுத்து, உரிய உரிமம் இல்லாத சிறுவனிடம் காரைக் கொடுத்ததற்காக வாகனத்தின் உரிமையாளரான மங்கிலால் என்பவர் மீதும் காவல்துறையினர் வழக்குப் பதிவு செய்துள்ளனர்.