“சிறுமியை மறித்து பாலியல் தொல்லை”.. கைகூப்பி கெஞ்ச வைத்த கொடூரம்… பீகாரை உலுக்கிய வீடியோவால் கொதித்தெழுந்த ராகுல் காந்தி.. போக்சோ சட்டத்தில் அதிரடி கைது.!!

பீகார் மாநிலம் ஜமுய் நகரில் பத்தாம் வகுப்பு படித்து வரும் சிறுவனும் சிறுமியும் தங்களது பயிற்சி வகுப்பை முடித்துவிட்டுத் திரும்பியபோது, வழியில் நின்றிருந்த ஒரு கும்பல் அவர்களை மறித்துக் கொடூரமான பாலியல் அத்துமீறலில் ஈடுபட்டுள்ளது. ‘கலாச்சாரக் காவல்’ என்ற பெயரில் அக்கும்பல் சிறுமிக்கு பாலியல் தொல்லை கொடுத்து, அவர்களைக் கைகூப்பிக் கெஞ்ச வைத்த காட்சிகளைத் தங்களது மொபைல் போனிலும் வீடியோ எடுத்து சமூக வலைதளங்களில் பகிர்ந்துள்ளனர். இந்த வீடியோ இணையத்தில் பரவி மக்களிடையே பெரும் கொந்தளிப்பை ஏற்படுத்தியதைத் தொடர்ந்து, ஜமுய் காவல்துறையினர் வழக்குப் பதிவு செய்து முதற்கட்டமாக மூன்று பேரைக் கைது செய்துள்ளனர்.

இந்தக் கொடூரச் சம்பவத்திற்கு மக்களவை எதிர்க்கட்சித் தலைவர் ராகுல் காந்தி கடும் கண்டனம் தெரிவித்துள்ளார். பெண்களின் உடல் மீதும், தேர்வுகளின் மீதும் ஆண்களுக்கு அதிகாரம் உள்ளது என்ற ஆணாதிக்க மனநிலையே இதற்குக் காரணம் என்று சாடியுள்ள அவர், குற்றவாளிகள் அனைவரும் போக்ஸோ சட்டத்தின்கீழ் மிகக் கடுமையாகத் தண்டிக்கப்பட வேண்டும் என வலியுறுத்தியுள்ளார். மேலும், சம்பவம் நடந்து இரண்டு நாட்கள் ஆகியும் அனைத்துக் குற்றவாளிகளும் ஏன் இன்னும் கைது செய்யப்படவில்லை என்றும், பொதுவெளியில் பெண்களுக்கான பாதுகாப்பை உறுதி செய்யத் தவறியது ஏன் என்றும் பீகார் மாநில அரசிற்கு அவர் அதிரடிக் கேள்விகளை எழுப்பியுள்ளார்.

இச்சம்பவம் தற்போது பீகார் மாநில அரசியல் களத்தில் ஆளும் பாஜக – ஜேடியூ கூட்டணி அரசுக்கும், எதிர்க்கட்சியான காங்கிரஸுக்கும் இடையே பெரும் அரசியல் மோதலை வெடிக்கச் செய்துள்ளது. பீகாரில் சட்டம் ஒழுங்கு முற்றிலும் சீர்குலைந்து ‘ஜங்கிள் ராஜ்’ (காட்டு ஆட்சி) நிலவுவதாகக் காங்கிரஸ் செய்தித் தொடர்பாளர் ஷாமா முகமது மிகக் கடுமையான விமர்சனங்களை முன்வைத்துள்ளார். வீடியோ ஆதாரங்களின் அடிப்படையில் எஞ்சிய குற்றவாளிகளைப் பிடிப்பதற்கான தேடுதல் வேட்டையை அம்மாநிலக் காவல்துறையினர் தற்போது தீவிரப்படுத்தியுள்ளனர்.