“ஊர விட்டே ஒதுக்கி வச்சிட்டாங்க” திமுகவிலிருந்து தவெகவுக்கு தாவியதால் ஊர் கட்டுப்பாடு.. நாகை அருகே திமுகவினரின் அரசியல் தீண்டாமையால் பரபரப்பு..!!

தமிழ்நாட்டில் திராவிட முன்னேற்றக் கழகத்தில் இருந்து விலகி, தமிழக வெற்றிக் கழகத்தில் இணைந்த மாற்றுக்கட்சி நிர்வாகிகளையும் தொண்டர்களையும் ஊரை விட்டு ஒதுக்கிவைத்துள்ளதாக எழுந்துள்ள விவகாரம் நாகப்பட்டினம் அருகே பெரும் பரபரப்பையும் அதிர்ச்சியையும் ஏற்படுத்தியுள்ளது. நாகை மாவட்டம் வேதாரண்யம் அடுத்த பகுதியில் தவெகவில் இணைந்த பட்டியல் சமூகத்தைச் சேர்ந்த மக்களை இலக்கு வைத்து, உள்ளூர் திமுகவினர் இத்தகைய கட்டுப்பாடு விதித்துள்ளதாகப் புகார்கள் எழுந்துள்ளன.

அரசியல் காழ்ப்புணர்ச்சி காரணமாக எடுக்கப்பட்டுள்ள இந்த ஊர் விலக்கல் நடவடிக்கையால், பாதிக்கப்பட்ட தவெகவினர் தங்களது வாழ்வாதாரத்தையும் சமூகத் தொடர்புகளையும் இழந்து தவித்து வருகின்றனர். தங்களின் வீடுகளில் நடக்கும் காதுகுத்து, திருமணம் போன்ற சுப நிகழ்ச்சிகள் மற்றும் மரணம் போன்ற துக்க நிகழ்வுகளில் கூட தங்களை ஊரே ஒட்டுமொத்தமாகப் புறக்கணிப்பதாகவும், யாரும் தங்களோடு பேசக் கூடாது என திமுகவினர் தடை விதித்துள்ளதாகவும் பாதிக்கப்பட்ட குடும்பத்தினர் கண்ணீர் மல்கக் குற்றஞ்சாட்டியுள்ளனர்.

மக்களாட்சி தத்துவத்திற்கு முரணான இந்தத் தீண்டாமைப் போக்கைக் கண்டித்துள்ள தவெகவினர், தங்களுக்கு இழைக்கப்படும் அநீதிக்கு எதிராகத் தமிழ்நாடு அரசும் மாவட்ட நிர்வாகமும் உடனடியாகத் தலையிட்டு உரிய சட்ட நடவடிக்கை எடுக்க வேண்டும் என உருக்கமான கோரிக்கை விடுத்துள்ளனர். இந்தச் சம்பவம் தற்போதைய தவெக – திமுக அரசியல் மோதலுக்கு இடையே, நாகை மாவட்ட கிராமப்புறப் பகுதிகளில் மிகக் கடுமையான விவாதங்களையும் சமூகப் பரபரப்பையும் ஏற்படுத்தியுள்ளது.