நள்ளிரவு வீடுகளுக்குள் புகுந்த ரேஞ்சர்ஸ் படை… பாகிஸ்தானில் அடுத்தடுத்து மாயமாகும் சிறுவர்கள்..! வெளிவந்த திடுக்கிடும் உண்மைகள்..!!

பாகிஸ்தானின் பல்வேறு பகுதிகளில் மக்களுக்கு எதிரான வன்முறைகள் தொடரும் நிலையில், கராச்சி மற்றும் பலுசிஸ்தானில் நடத்தப்பட்ட சோதனைகளில் 14 வயது மாணவர்கள் இருவர் உட்படப் பலர் கட்டாயமாகக் காணாமல் ஆக்கப்பட்டுள்ளதாகக் குறிப்பிடப்பட்டுள்ளது. ‘தி பலுசிஸ்தான் போஸ்ட்’ அறிக்கையின்படி, கராச்சியின் மொரிபூர் பகுதியில் உள்ள திகிரி என்ற இடத்தில் ஆகஸ்ட் 6 அன்று 28 வயதான தொழிலாளி சபீர் என்பவரை பாகிஸ்தான் ரேஞ்சர்ஸ் படையினர் அழைத்துச் சென்றனர். அதேபோல, 30 வயதான அப்துல் அஜீஸ் மற்றும் 28 வயதான கடைக்காரர் ஆமிர் ஆகியோரையும் ரேஞ்சர்ஸ் மற்றும் பயங்கரவாத எதிர்ப்புப் படையினர் கைது செய்து அழைத்துச் சென்றனர். இவர்கள் எங்கு வைக்கப்பட்டுள்ளார்கள் என்பது பற்றிய எந்தத் தகவலும் குடும்பத்தினருக்கு இதுவரை வழங்கப்படவில்லை.

அதேபோல, பலுசிஸ்தானின் குவெட்டாவில் உள்ள சரியாப் சாலையில் ஜூலை 24 அன்று அதிகாலை 14 வயதுடைய இரு பள்ளி மாணவர்களை பயங்கரவாத எதிர்ப்புப் படை மற்றும் ஐ.எஸ்.ஐ படையினர் கைது செய்து அழைத்துச் சென்றனர். மேலும், பலுசிஸ்தானின் புலேடாவைச் சேர்ந்த மன்சூர் அன்வர் என்பவர் ஆகஸ்ட் 4 அன்று அதிகாலை பாகிஸ்தான் படைகளால் வீட்டிலிருந்து கைது செய்யப்பட்டார். இவர் ஏற்கனவே 2023 நவம்பரில் இதேபோன்று கட்டாயமாகக் காணாமல் ஆக்கப்பட்டு, இரண்டு மாதங்களுக்குப் பிறகு 2024 ஜனவரியில்தான் மீட்கப்பட்டிருந்தார் என்பது குறிப்பிடத்தக்கது.

மற்றொரு சம்பவத்தில், பலுசிஸ்தானின் குஜ்தார் மாவட்டத்தில் பாகிஸ்தான் ஆதரவுப் படைகளால் பலூச் சமூகத்தைச் சேர்ந்த இனாயத்துல்லா ஜத்தாக் என்பவர் சுட்டுக் கொல்லப்பட்டதற்குப் பலூச் ஆர்வலர்கள் மற்றும் மனித உரிமைக் குழுக்கள் கடும் கண்டனம் தெரிவித்துள்ளன. இனாயத்துல்லாவின் மகள் அஸ்மா ஜத்தாக், தங்களது குடும்பத்தினரின் உயிருக்கு ஆபத்து இருப்பதாகச் சமூக வலைதளங்களில் பகிரங்கமாக முறையிட்டுப் பாதுகாப்பு கோரிய சில மணி நேரங்களிலேயே இத்துப்பாக்கிச் சூடு சம்பவம் நடந்துள்ளது.