“அவங்களுக்கு இனிமேதான் இருக்கு..!” ஃப்ளைதுபாய் விமான விவகாரத்தில் சிக்கிய ஈரான்… டிரம்ப் கொடுத்த மரண பயம் எச்சரிக்கை…!!

இஸ்ரேல் நோக்கிச் சென்ற விமானத்தை விபத்துக்குள்ளாக்க முயன்ற ‘ஃப்ளைதுபாய்’ விமானத்தின் துணை விமானிக்கும், ஈரானுக்கும் இடையே தொடர்பு இருக்கலாம் என்று அமெரிக்க அதிபர் டொனால்டு டிரம்ப் தெரிவித்துள்ளார். வெள்ளை மாளிகையில் செய்தியாளர்களைச் சந்தித்த அவரிடம், இந்த தாக்குதல் முயற்சிக்கும் ஈரான் அரசுக்கும் தொடர்பு உள்ளதா என்று கேட்கப்பட்டபோது, தமக்குக் கிடைத்த தகவல்களின்படி இதற்கான பதில் ‘ஆம்’ என்றே தோன்றுவதாகவும், இது குறித்து தற்போது தீவிர விசாரணை நடைபெற்று வருவதாகவும் கூறினார். மேலும், இந்த தாக்குதலின் பின்னணியில் ஈரான் இருப்பது உறுதியானால், அவர்கள் அமெரிக்காவால் மிகக் கடுமையான தாக்குதலுக்கு உள்ளாவார்கள் என்றும் டிரம்ப் எச்சரித்துள்ளார்.

இதற்கிடையில், இந்த விவகாரம் குறித்து ஃபாக்ஸ் நியூஸ் தொலைக்காட்சிக்கு பேட்டியளித்த இஸ்ரேலிய பிரதமர் பெஞ்சமின் நெதன்யாகு, அந்த துணை விமானியை இப்போதைக்கு ஈரானுடனோ அல்லது வேறு யாருடனோ தொடர்புபடுத்துவது மிக முன்கூட்டிய முடிவாக இருக்கும் என்று குறிப்பிட்டுள்ளார். அத்தகைய தொடர்புகள் ஏதேனும் இருந்தனவா என்பதை ஓரிரு நாட்களில் தெளிவாகக் கூற முடியும் என்றும் அவர் கூறினார். எனினும், அந்த துணை விமானியின் தனிப்பட்ட தகவல்களைத் திரட்டியதில் இருந்து, அவர் இஸ்லாமிய தீவிரவாத கருத்தியல் திணிப்புக்கு உள்ளாக்கப்பட்டது மட்டும் தங்களுக்குத் தெரியவந்துள்ளதாக நெதன்யாகு மேலும் விளக்கமளித்துள்ளார்.