பெரும் பரபரப்பு..! கிருஷ்ணகிரியில் மாயமான சிறுவன் சென்னையில்… சமயோசிதமாக மீட்ட ஆட்டோ ஓட்டுநருக்கு குவியும் பாராட்டு.. நடந்தது என்ன..?

கிருஷ்ணகிரி மாவட்டம் ஊத்தங்கரை அருகே டியூஷனுக்குச் சென்ற வழியில் திடீரென மாயமான 12 வயது பள்ளி மாணவன் சஞ்சய், சென்னையில் பத்திரமாக மீட்கப்பட்டுள்ளார். வீட்டில் பெற்றோர் திட்டியதால் ஏற்பட்ட கோபத்தில், யாரிடமும் கூறாமல் அந்தச் சிறுவன் சென்னைக்குத் தனியாகப் பயணித்துள்ளது போலீசாரின் முதற்கட்ட விசாரணையில் தெரியவந்துள்ளது. இந்தத் தகவல் சிறுவனின் குடும்பத்தினருக்கும், உறவினர்களுக்கும் பெரும் நிம்மதியை ஏற்படுத்தியுள்ளது.

சென்னையை வந்தடைந்த சிறுவன் சஞ்சய், சென்னை சென்ட்ரல் ரயில் நிலையத்திற்குச் செல்வதற்காக ஒரு ஆட்டோவில் ஏறியுள்ளான். அப்போது, அவ்வளவு சிறிய சிறுவன் தனியாக ஆட்டோவில் பயணிப்பதைக் கண்டு சந்தேகமடைந்த ஆட்டோ ஓட்டுநர், சமயோசிதமாகச் செயல்பட்டு உடனடியாக அந்தச் சிறுவனை அருகில் இருந்த காவல் நிலையத்தில் ஒப்படைத்தார். ஆட்டோ ஓட்டுநரின் இந்த விழிப்புணர்வும், பொறுப்பான செயலும் சிறுவனைப் பத்திரமாக மீட்க முக்கியக் காரணமாக அமைந்தது.

சிறுவன் மாயமானது குறித்து ஏற்கனவே கிருஷ்ணகிரி மாவட்ட காவல்துறையினர் வழக்குப் பதிவு செய்து தேடி வந்த நிலையில், தற்போது சென்னை போலீசார் சிறுவனைத் தங்களது பாதுகாப்பில் வைத்துள்ளனர். இதனைத் தொடர்ந்து, சிறுவனின் பெற்றோருக்குத் தகவல் கொடுக்கப்பட்டு, அவர்களைச் சென்னைக்கு வரவழைத்து சிறுவனைப் பெற்றோரிடம் பத்திரமாக ஒப்படைப்பதற்கான அடுத்தகட்ட நடவடிக்கைகளை காவல்துறையினர் தீவிரமாக மேற்கொண்டு வருகின்றனர்.