பிணம் தின்னும் கழுகு மாதிரி இந்த ஆளு.. தற்பெருமை தேடிக்குவாரு… PTR போட்ட பதிவால் பரபரப்பு.. யாரை சொல்கிறார்..? அரசியல் வட்டாரத்தில் அதிர்ச்சி..!!

மதுரை அருள்மிகு மீனாட்சி சுந்தரேசுவரர் திருக்கோயிலின் வீரவசந்தராயர் மண்டபம், கடந்த 2018-ஆம் ஆண்டு நிகழ்ந்த தீ விபத்தில் பலத்த சேதமடைந்தது. வரலாற்றுச் சிறப்பும் கலை நேர்த்தியும் மிக்க இம்மண்டபத்தை இந்து சமய அறநிலையத்துறை மீண்டும் புனரமைத்து, அண்மையில் பணிகளை நிறைவுசெய்துள்ளது. இந்த மைல்கல் சாதனையைப் பாராட்டி எக்ஸ் தளத்தில் பதிவிட்ட மதுரை நாடாளுமன்ற உறுப்பினர் சு.வெங்கடேசன், தலைமைச் சிற்பி வி.பி.வேல்முருகன் மற்றும் சிற்பக் கலைஞர்களுக்கு வாழ்த்துத் தெரிவித்தார். அதே வேளையில், 2019-இல் எம்பியாகத் தேர்வானது முதல் இத்திருப்பணியின் தொடக்கக்கட்டத்தில் அவரோடு தானும் முழுமையாக உடன் நின்றதாகக் குறிப்பிட்டிருந்தார்.

சு.வெங்கடேசனின் இந்தப் பதிவைச் சுட்டிக்காட்டிய நெட்டிசன் ஒருவர், “இந்து சமய அறநிலையத்துறை விவகாரங்கள் தொடர்பாக முன்னாள் அமைச்சர் பிடிஆர் பழனிவேல் தியாகராஜன் முன்னர் மறைமுகமாக விமர்சித்த நபர் இவர் தானா?” என்ற கேள்வியை எழுப்பினார். அந்த நெட்டிசனின் சந்தேகத்திற்கு உடனடியாகப் பதிலளித்த பிடிஆர் பழனிவேல் தியாகராஜன், சு.வெங்கடேசனை மிகக் காரசாரமாகச் சாடினார்.

பிடிஆர் தனது பதிலில், “இல்லை… இவர் வேறு வகை. தனக்கு எந்தவிதச் சம்பந்தமும் இல்லாத நூற்றுக்கணக்கான விஷயங்களுக்குத் தானே உரிமை கோரிப் பெருமை தேடிக் கொள்வதில் இவர் பெரும் கில்லாடி. பல மைல் தூரத்திலிருந்தே பிணத்தின் வாசனையைத் துல்லியமாக உணர்ந்து பறந்து வரும் கழுகைப் போன்றவர் இவர்” என்று மிகக் கடுமையான சொற்களால் கடுமையாக விமர்சித்தார்.

திமுக தலைமையிலான கூட்டணியில் மார்க்சிஸ்ட் கம்யூனிஸ்ட் கட்சி அங்கமாக இருக்கும் சூழலில், அதே கூட்டணியைச் சேர்ந்த முக்கியத் தலைவர்கள் இருவரிடையே ஏற்பட்டுள்ள இந்த நேருக்கு நேர் மோதல் அரசியல் களத்தில் பெரும் சலசலப்பை உருவாக்கியுள்ளது. கடந்த 2019 முதல் மதுரை எம்.பியாக இருந்து வரும் சு.வெங்கடேசனையும், 2016 முதல் 2026 வரை மதுரை மத்திய தொகுதி எம்.எல்.ஏவாகவும் அமைச்சராகவும் செயல்பட்ட பிடிஆர் பழனிவேல் தியாகராஜனையும் மையமாகக் கொண்டு வெடித்துள்ள இந்த விவாதம் இணையத்தில் தீயாகப் பரவி வருகிறது.