“ஏன் சார் மின் கம்பங்கள திருடி வித்துட்டாங்கனு…” ஆதாரத்துடன் கேள்வி கேட்ட இளைஞரை தரக்குறைவாகப் பேசிய ஊராட்சி செயலாளர்.. நெட்டிசன்களை கொதிக்க வைத்த வைரல் வீடியோ..!!

“மின்சாரக் கம்பங்களைத் திருடி விற்றுவிட்டார்கள் எனப் புகார் அளித்தால், புகார் கொடுத்தவரின் எண்ணையே பிளாக் செய்வது ஏன்? ஏன் நடவடிக்கை எடுக்கவில்லை எனக் கேட்டால் அநாகரிகமாகப் பேசுவது ஏன்?”. ராமநாதபுரம் மாவட்டம் திருவாடானை தாலுகா, மாவூர் ஊராட்சி செயலாளரின் இத்தகைய அலட்சியமான மற்றும் பொறுப்பற்ற பதில்கள் அடங்கிய வீடியோ தற்போது சமூக ஊடகங்களில் வெளியாகி மிக வேகமாக வைரலாகி வருகிறது. மாவூர் ஊராட்சியில் மின் கம்பங்கள் திருட்டு போனது குறித்துப் பொதுமக்களின் சார்பில் ஊராட்சி செயலாளரிடம் தொலைபேசி வாயிலாகக் கேள்வி எழுப்பப்பட்ட போதே, அவர் உரிய முறையில் பதிலளிக்காமல் புகார் தாரர்களைத் துண்டிக்கும் வகையில் அநாகரிகமாக நடந்துகொண்டதாகக் குற்றம் சாட்டப்பட்டுள்ளது.

“ஏன் சார் மின் கம்பங்கள திருடி வித்துட்டாங்கனு புகார் கொடுத்தா புகார் கொடுத்தவங்க நம்பரயே ப்ளாக் பண்ணுவீங்களா? ஏன் நடவடிக்கை எடுக்கலனு கேட்டா தரக்குறைவா பேசுவீங்களா?”

ராமநாதபுரம் மாவட்டம், திருவாடானை தாலுகா மாவூர் ஊராட்சி செயலாளரின் அலட்சியமான பதில்கள்.. வைரலாகும் வீடியோ… pic.twitter.com/IbXzPSND2R— Polimer News (@polimernews) August 20, 2026

அரசு அதிகாரிகளின் இத்தகைய அலட்சியப் போக்கு மற்றும் முறைகேடுகள் குறித்த இந்த வீடியோ, இணையத்தில் பெரும் விவாதத்தைக் கிளப்பியுள்ளது. மின் கம்பங்கள் போன்ற பொதுச் சொத்துக்கள் திருடப்பட்டதாக வரும் புகார்கள் மீது உடனடியாக விசாரணை நடத்தி நடவடிக்கை எடுக்க வேண்டிய ஊராட்சி செயலாளரே, கேள்வி கேட்ட பொதுமக்களின் எண்களைத் தடை செய்வதும், அவர்களிடம் மிரட்டும் தொனியில் பேசுவதும் அதிர்ச்சியை ஏற்படுத்தியுள்ளது. இந்த வீடியோ வைரலானதைத் தொடர்ந்து, சம்பந்தப்பட்ட மாவூர் ஊராட்சி செயலாளர் மீது ராமநாதபுரம் மாவட்ட நிர்வாகம் மற்றும் திருவாடானை வட்டார வளர்ச்சி அலுவலர் கடுமையான துறை ரீதியான நடவடிக்கை எடுக்க வேண்டும் எனப் பொதுமக்கள் மற்றும் சமூக ஆர்வலர்கள் கோரிக்கை விடுத்து வருகின்றனர்.